នៅថ្ងៃទី ០៧ ខែកុម្ភៈ ឆ្នាំ ២០២៥ លោកគ្រូចិនសែ ម៉ុង ដែលកំពុងមានប្រជាប្រិយភាពតាមរយៈការចែករំលែកចំណេះដឹងហុងស៊ុយ បានចែករំលែកនូវរឿងរ៉ាវឆ្នាំទាំង ១២ ដែលបានកើតឡើង និង របៀបកែកុនក្នុងខែ «កុម្ភៈ» នេះ ដែលតាមក្បួនហុងស៊ុយគិតចាប់ពីថ្ងៃទី ០៣ ខែកុម្ភៈ ដល់ថ្ងៃទី ០៥ ខែមីនា ឆ្នាំ ២០២៥។
ជាក់ស្ដែង រឿងរ៉ាវឆ្នាំទាំង ១២ ដែលកើតឡើង ក្នុងខែកុម្ភៈ ឆ្នាំ ២០២៥ មានដូចតទៅ ៖
១. ឆ្នាំជូត
ក្នុងខែនេះ ថាមពលរាសីរបស់អ្នក គឺមានភាពល្អប្រសើរខ្លាំង អ្នកអាចមានគំនិតថ្មីៗ ក្នុងការដោះស្រាយបញ្ហាចំពោះមុខ ឬមានគំនិតក្នុងការបើករកស៊ីរបរថ្មី តែសូមអ្នកប្រុងប្រយ័ត្នបន្តិច ព្រោះអ្វីដែលនិយាយខាងលើនេះ អាចរារាំងដោយមនុស្សម្នាក់ ដែលគេម្នាក់នោះ បែរជាចូលចិត្តអ្នកខ្លាំង ឬនិយាយផ្អែមៗ ជាមួយអ្នកក្នុងខែកុម្ភៈនេះ។
ដំណោះស្រាយ ៖ សូមព្យាយាមធ្វើបុណ្យចែកទានឱ្យបានច្រើនតាមការគួរ និង គួរពាក់ប្លាទីនសជាប់ខ្លួនឱ្យបានយ៉ាងតិច ១។
២. ឆ្នាំ ឆ្លូវ
រាសីរបស់អ្នកក្នុងខែនេះ ប្រយ័ត្នគេបោកប្រាស់កេងចំនេញលើកម្លាំង ឬ រាងកាយរបស់អ្នក ការបោកប្រាស់នេះកើតចេញពីមនុស្សដែលអ្នកស្រលាញ់ ឬ ទុកចិត្តបំផុត ដូចនេះប្រយ័ត្នឱ្យបានខ្ពស់។ សម្រាប់អ្នកដែលកំពុងមានជំងឺដុំសាច់ ឬ ជំងឺមហារីក សូមប្រុងប្រយ័ត្នលើបញ្ហាផ្លូវចិត្តបន្តិច ហើយគួរទៅលេងតំបន់ភ្នំឱ្យបានច្រើន ដូចជាតំបន់ខេត្តកំពត ភ្នំបូកគោ ភ្នំគីរីរម្យជាដើម
ដំណោះស្រាយ ៖ សូមអ្នកព្យាយាមហូបអាហារបួស បន្លែឱ្យបានច្រើនតាមដែលអាចធ្វើទៅបាន កាន់តែហូបកាន់តែល្អប្រសើរ។
៣. ឆ្នាំខាល
ក្នុងខែនេះ អ្នកអាចមានស្មារតីល្អខ្លាំង ការងារជាច្រើនដែលស្ទះ អាចដោះស្រាយចេញជាបន្តបន្ទាប់ តែចាប់ផ្ដើមដោះចេញពីបញ្ហាតូចៗទៅមុន។ ក្នុងខែនេះ អ្នកឆ្នាំខាលអាចនិយាយថា រហ័សជាងខែមុន ដូចនេះអ្នកត្រូវយកចិត្តទុកដាក់ប្រើប្រាស់ពេលវេលាក្នុងខែនេះឱ្យបានល្អបំផុត ព្រោះឆ្នាំនេះអ្នកឆុងឆ្នាំផង ខែល្អមិនសូវមានច្រើនទេ។
ដំណោះស្រាយ ៖ គួរឧស្សាហ៍ធ្វើបុណ្យឱ្យបានច្រើន តាមដែលអាចធ្វើទៅបាន។
៤. ឆ្នាំថោះ
រាសីខែនេះគឺមិនសូវល្អប៉ុន្មាននោះទេ សូមប្រុងប្រយ័ត្នគ្រោះថ្នាក់ពាក់ព័ន្ធជាមួយឆ្អឹង ដូចជាឈឺឆ្អឹង ចុកដៃចុកជើង បាក់ថ្លោះ ជាដើម។ ចំពោះរឿងផ្សេងៗទៀត គឺមិនជាបញ្ហានោះទេ។
ដំណោះស្រាយ ៖ ក្នុងខែនេះ បើអាចសូមអ្នកទៅបរិច្ចាគឈាម ឬ បូមឈាមចេញពីខ្លួនបន្តិច ឬ ធ្វើយ៉ាងណាឱ្យមានឈាមហូរចេញពីខ្លួនបន្តិច គឺអាចឆ្លងផុតបានច្រើនភាគរយគួរសម តែយ៉ាងណាក៏ត្រូវប្រុងប្រយ័ត្នបន្ថែម។
៥. ឆ្នាំរោង
ក្នុងខែនេះ សូមអ្នកប្រុងប្រយ័ត្នជាមួយគ្រោះថ្នាក់នៅតំបន់ព្រៃភ្នំ ជាពិសេសសម្រាប់អ្នកដែលធ្វើការងារជាមួយគ្រឿងឈើ សូមប្រយ័ត្នបន្តិច ព្រោះអ្នកមានរបួសធ្ងន់ជាមួយគ្រឿងឈើ ឬវត្ថុធ្វើពីឈើ។ មួយទៀតសូមប្រុងប្រយ័ត្នជាមួយគ្រោះថ្នាក់ដោយសារភ្លើង រលាកកម្រិតធ្ងន់។
ដំណោះស្រាយ ៖ សូមអ្នកធ្វើបុណ្យឱ្យបានច្រើនជាមួយព្រះសង្ឃតាមដែលអាចធ្វើទៅបាន ពេលអ្នកអានអត្ថបទនេះហើយ សូមកាត់ក្រចកដៃ និង ក្រចកជើង ហើយប្រមូលក្រចកទាំងអស់នោះ ទៅដាក់នៅផើងផ្កា ឬយកទៅបណ្ដែងទឹកទន្លេក៏បានដែរ។
៦. ឆ្នាំម្សាញ់
រាសីក្នុងខែនេះ អាចនិយាយបានថាឆុងបន្តិចហើយ ភាគច្រើនបញ្ហាធំលើផ្លូវចិត្ត អាចឱ្យអ្នកឈឺក្បាលខ្លាំង ឬ ញឹកញាប់ ជាពិសេសគិតច្រើនខុសរបៀប បើនិយាយចំពោះអ្នកដែលកើតវិបត្តិផ្លូវចិត្តវិញ អាចកាន់តែធ្ងន់ធ្ងរបន្ថែមទៀត។
ដំណោះស្រាយ ៖ សូមទៅលេងតំបន់ទឹកឈូ ទឹកធ្លាក់ ត្រាំទឹកធម្មជាតិលេងឱ្យបានច្រើន ទើបអាចសម្រួលបានខ្លះ។
៧. ឆ្នាំមមី
រាសីអ្នកក្នុងខែនេះ ជាខែដែលរាសីអ្នកឡើងខ្លាំង ដូចនេះសូមអ្នកប្រញាប់ទៅធ្វើការងារដែលអ្នកកំពុងធ្វើចុះ ព្រោះអាចទទួលបានជោគជ័យខ្ពស់។ រឿងដែលត្រូវប្រុងប្រយ័ត្នគឺអ្នកអាចមានជម្លោះជាមួយអ្នកមានគុណធ្ងន់ធ្ងរមួយ ដូចនេះត្រូវចេះទប់អារម្មណ៍ឱ្យបាននឹងនរ រក្សាចិត្តឱ្យត្រជាក់បំផុត តាមដែលអាចធ្វើទៅបាន ដើម្បីកុំឱ្យជម្លោះកាន់តែធ្ងន់ធ្ងរទៅទៀត។
ដំណោះស្រាយ ៖ សូមព្យាយាមរកស្លឹកទទឹម ៥ ត្រួយ មកត្រាំក្នុងទឹកស្អាត ១ ធុន ហើយងូតមុនចូលគេង អាចធ្វើបន្ទាប់ពីអ្នកបានអានអត្ថបទខាងលើនេះរួច។
៨. ឆ្នាំមមែ
ក្នុងខែនេះ រាសីអ្នកមិនសូវល្អនោះទេ អ្នកអាចជួបជាមួយក្រុមមនុស្សដែលមានចរិតកាចសាហាវដែលចង់មកបង្ករឿងជាមួយអ្នក បើអ្នកមិនទប់ខ្លួនទេ អ្នកអាចមានហិង្សាជាមួយក្រុមមនុស្សទាំងនោះ រហូតដល់ខាតបង់ធ្ងន់ធ្ងរបំផុត។
ដំណោះស្រាយ ៖ សូមអ្នកហូបអាហារក្ដៅៗ ឱ្យបានច្រើនតាមដែលអាចធ្វើទៅបាន។
៩. ឆ្នាំវក
រាសីក្នុងខែនេះ អាចជ្រុះបាត់របស់មានតម្លៃ ដូចនេះសូមប្រុងប្រយ័ត្នឱ្យបានខ្ពស់តាមដែលអាចធ្វើទៅបាន។ អ្នកធ្វើការងារ អាចបាត់បង់ឪកាសការងារភ្លាមៗ សញ្ញាដែលអ្នកត្រូវបានបាត់បង់ការងារភ្លាមៗ មានដូចជា ឧស្សាហ៌វិលមុខ ចុកពោះ សុបិន្តអាក្រក់ បើមានសញ្ញាទាំងនេះ គឺមិនសូវល្អនោះទេ អាចបាត់ការងារ។
ដំណោះស្រាយ ៖ សូមព្យាយាមបរិច្ចាគខោអាវរបស់អ្នក ១ កំប្លេទៅកាន់ជនក្រីក្រ ឬជនខ្វះខាត គឺអាចកាត់បន្ថយគ្រោះខាងលើបានច្រើនភាគរយដូចគ្នា។
១០. ឆ្នាំរកា
រាសីអ្នកឆ្នាំរកា គឺល្អប្រសើរខ្លាំង អ្នកអាចទទួលបានឱកាសការងារច្រើន ហើយជាឱកាសដែលអ្នកអាចរកបានប្រាក់ច្រើនផងដែរ ចំពោះអ្នកពិបាកមានបុត្រ សូមព្យាយាមយកបុត្រក្នុងខែនេះ ព្រោះអាចមានថាមពលបុណ្យម្យ៉ាងដែលជួយឱ្យអ្នកឆាប់មានបុត្រ។
ដំណោះស្រាយ ៖ បើអ្នកចង់ហេងខ្លាំងជាងនេះ សូមកាត់សក់ឱ្យបានម្ដងក្នុងខែនេះ ជាពិសេសអាចកាត់បាននៅរៀងរាល់ថ្ងៃ ច័ន្ទ សុក្រ មិនកំណត់ម៉ោងទេ។
១១. ឆ្នាំច
រាសីក្នុងខែនេះ គឺល្អខ្លាំងណាស់ ការងារមិនមានពេលសម្រាកនោះទេ អ្នកឆ្នាំច គួរចំណាយពេលធ្វើបុណ្យសំពះព្រះកាន់តែច្រើន រាសី ឱកាសអ្នកកាន់តែរីកចម្រើនជាងបន្ថែមទៀត។
ដំណោះស្រាយ ៖ អ្នកឆ្នាំច គួរត្រាំទឹកត្រជាក់ៗឱ្យបានច្រើន គឺកាន់តែឱ្យអ្នកគិតការងារកាន់តែធ្លុះល្អ។
១២. ឆ្នាំកុរ
ជាទូទៅឆ្នាំកុរ អាចងាយឈ្លោះគ្នាដោយសារពាក្យសំដីបន្តិច ដូចនេះការងារមួយចំនួនត្រូវបានខូចការដោយសារតែពាក្យសំដីរបស់អ្នក ដូចនេះបន្ថយការនិយាយស្ដីឱ្យបានច្រើន រឿងនិយាយដើមគេប្រយ័ត្នម្ចាស់គេចាប់បាន។
ដំណោះស្រាយ ៖ សូមលែងត្រីទឹកសាបចំនួន ៨ ក្បាល ដើម្បីកាត់បន្ថយគ្រោះខាងលើនេះ៕
ប្រភព ៖ ហុងស៊ុយ
