ក្នុងខេត្តព្រះវិហារ! ពលរដ្ឋប្រមាណជាង ៣ ពាន់នាក់ នៅតំបន់សមរភូមិ ត្រូវបានជម្លៀសទៅកាន់កន្លែងសុវត្ថិភាព ដែលអាជ្ញាធរបានរៀបចំនៅស្រុកគូលែន

តាមរយៈព័ត៌មានដែលទទួលបាននៅថ្ងៃទី ១៧ ខែមិថុនា ឆ្នាំ ២០២៥ នេះ មានប្រជាពលរដ្ឋចំនួន ១,០៤៧ គ្រួសារ ស្មើមនុស្សប្រមាណជាង ៣,០០០ នាក់ រស់នៅភូមិចំនួន ៦ ក្នុងតំបន់សមរភូមិមុខតំបន់មុំបី អានសេះ និង ជាំតែ ដែលមានការភ័យខ្លាចក្នុងការប្រឈមមុខដាក់គ្នារវាងកងទ័ពកម្ពុជា-ថៃ បានជម្លៀសខ្លួនទៅកាន់កន្លែងសុវត្ថិភាព ដែលអាជ្ញាធរខេត្តព្រះវិហារ បានរៀបចំជាស្រេចក្នុងវត្តពោធិ៍ ៥០០០ដើម ស្ថិតនៅស្រុកគូលែន។

ទាក់ទិនទៅនឹងរឿងនេះ តាមរយៈសារព័ត៌មានក្នុងស្រុកបានឱ្យដឹងថា អភិបាលខេត្តព្រះវិហារ លោក គីម រិទ្ធី បានបញ្ជាក់នៅថ្ងៃទី ១៧ ខែមិថុនា ឆ្នាំ ២០២៥ នេះថា ប្រជាពលរដ្ឋរស់នៅភូមិចំនួន ៦ នៅតំបន់សមរភូមិមុខ មានសរុបប្រមាណ ៩,០០០ នាក់ ប៉ុន្ដែក្នុងនោះមានជាង ៣,០០០ នាក់ ដែលមានការបារម្ភអំពីស្ថានភាពនៃការប្រឈមមុខដាក់គ្នារបស់កងទ័ពកម្ពុជា-ថៃ បានចាកចេញពីភូមិឋាន ដើម្បីទៅកន្លែងដែលមានសុវត្ថិភាពបណ្ដោះអាសន្នសិន។

តាមរយៈអភិបាលខេត្តព្រះវិហារ លោក គីម រិទ្ធី បានមានប្រសាសន៍បន្តថា អាជ្ញាធរខេត្តបានរៀបចំកន្លែងសុវត្ថិភាពជូនដល់ប្រជាពលរដ្ឋក្នុងវត្តពោធិ៍៥០០០ដើម ដែលមានទីតាំងស្ថិតនៅស្រុកគូលែន ចម្ងាយជាង ១០០ គីឡូម៉ែត្រពីតំបន់សមរភូមិ។ នៅក្នុងមណ្ឌលសុវត្ថិភាពបណ្ដោះអាសន្ននេះ អាជ្ញាធរខេត្តព្រះវិហារ បានរៀបចំគ្រឿងឧបភោគ បរិភោគ ស្បៀងអាហារជូនប្រជាពលរដ្ឋ តាមរយៈជំនួយរបស់កាកបាទក្រហមកម្ពុជា និង ស្បៀងបម្រុងទុករបស់រាជរដ្ឋាភិបាលកម្ពុជា។

បន្ថឺមលើសពីនេះ លោកអភិបាលខេត្ត ក៏បានអំពាវនាវដល់សប្បុរសជននានា អាចបន្ដឧបត្ថម្ភស្បៀងអាហារ បន្លែ ត្រី សាច់ និង សម្ភារៈផ្សេងៗតាមលទ្ធភាពមកកាន់អាជ្ញាធរខេត្តព្រះវិហារ ដើម្បីទុកបម្រើបំពេញតម្រូវការប្រចាំថ្ងៃរបស់ប្រជាពលរដ្ឋ នៅក្នុងមណ្ឌលសុវត្ថិភាពបណ្ដោះអាសន្ននេះ។ នៅមណ្ឌលសុវត្ថិភាពនេះ ក៏មានកុមារតូចៗផងដែរ ដូច្នេះសប្បុរសជនក៏អាចឧបត្ថម្ភនំចំណីសម្រាប់កុមារតូចៗបានដូចគ្នា៕

ប្រភព និង រូបភាព ៖ Fresh News