នៅថ្ងៃទី ២២ ខែសីហា ឆ្នាំ ២០២៥ នេះ សារព័ត៌មានបរទេស បានរាយការណ៍ពីការស្លាប់របស់ Streamer ជនជាតិបារាំងម្នាក់ ដែលបានធ្វើការឡាយវីដេអូ ១២ ថ្ងៃជាប់គ្នាមិនខ្ចីឈប់ ហើយចុងក្រោយត្រូវបានគេប្រទះឃើញអស់ជីវិតនៅក្នុងផ្ទះ។
តាមព័ត៌មានបានឱ្យដឹងថា Streamer ខាងលើនេះមានវ័យ ៤៦ ឆ្នាំ ឈ្មោះថា Raphael Graven។ ក្នុងនោះដែរ Graven ជាអតីតទាហានជើងចាស់ និងជាអ្នក Streamer ដ៏ពេញនិយមនៅលើបណ្តាញ Kick ដែលមានអ្នកតាមដានប្រមាណជាង ១លាននាក់។ នៅចុងក្រោយ Graven បានធ្វើការឡាយរហូតដល់ទៅ ៣០០ ម៉ោង ឬរយៈពេល ១២ ថ្ងៃជាប់គ្នា ហើយរកចំណូលពីការបរិច្ចាគបានប្រមាណ ៣៦ ០០០ អឺរ៉ូ ឬប្រហែលជាង ៤ ម៉ឺនដុល្លារ ហើយក្រោយមក នៅថ្ងៃទី ១៨ ខែសីហា ឆ្នាំ ២០២៥ កន្លងទៅ Graven ត្រូវបានគេប្រទះឃើញស្លាប់នៅក្នុងផ្ទះដែលស្ថិតនៅក្នុងទីក្រុង Nice។
យ៉ាងណាមិញ តាមព័ត៌មានបានឱ្យដឹងថា Graven មានជំងឺបេះដូង ហើយតែងតែប្រើថ្នាំជាប្រចាំ។ ដោយឡែក តាមការស៊ើបអង្កេតរបស់អាជ្ញាធរ គេមិនបានរកឃើញស្លាកស្នាមឃាតកម្មណាមួយនៅលើ Graven ឡើយ ប៉ុន្តែកន្លងមក Graven តែងតែត្រូវមិត្តរួមអាជីពធ្វើបាបលេងសើចញឹកញាប់ណាស់ ដោយបានបង្ខំកោរសក់ និង វាយតប់ ប្រើពាក្យសម្តីអសុរោះ Graven នៅនឹងមុខឡាយ ធ្វើឱ្យ Graven ខ្មាសអ្នកគាំទ្រមិនតិចដងឡើយ៕
ប្រភព៖ Khaosod
