ការប្តីជាគ្រូពេទ្យ ដល់យប់ផ្សំដំណេកកូនកំលោះពាក់ស្រោមដៃពេទ្យដេក អត់ហ៊ានប៉ះប្រពន្ធផ្ទាល់ ខ្លាចឆ្លងមេរោគ

សារព័ត៌មាន Suho បានទម្លាយពីរឿងរ៉ាវដ៏គួរឱ្យហួសចិត្តរបស់ស្រ្តីម្នាក់ ដែលបានចូលរោងការជាមួយនឹងកូនកំលោះជាគ្រូពេទ្យ ស្រាប់តែយប់ផ្សំដំណេក ខាងប្រុសពាក់ស្រោមដៃពេទ្យមកប៉ះនាង ហើយប្រាប់ថាមិនហ៊ានប៉ះផ្ទាល់ព្រោះខ្លាចឆ្លងមេរោគពីនាង។

តាមព័ត៌មានបានឱ្យដឹងថា នាងបានទាក់ទងជាមួយកូនកំលោះអស់រយៈពេល ១ ឆ្នាំ​ មុននឹងដឹកដៃគ្នាចូលរោងការ ដោយគេជាបុរសល្អណាស់ មិនសូវជាហ៊ានប៉ះពាល់នាងនោះទេ។ លុះពិធីរៀបការបានបញ្ចប់ទៅ ក៏ចូលបន្ទប់ផ្សំដំណេក ស្រាប់តែប្តីនាងបានទាញស្រោមដៃពេទ្យយកមកពាក់ ដែលធ្វើឱ្យនាងមានការងឿងឆ្ងល់ជាខ្លាំង។

អ្វីដែលនាងហួសចិត្តនោះ គឺប្តីបានប្រាប់នាងថា គេមិនហ៊ានប៉ះនាងដោយដៃផ្ទាល់ឡើយ ព្រោះតែខ្លាចឆ្លងមេរោគ។ នាងបានព្យាយាមសួរនាំប្តី តែប្តីប្រាប់ថាប្រហែលជាជាប់និស្ស័យនេះមកពីការធ្វើការ តែយូរទៅប្តីក៏ហាក់ដូចជាកាន់តែខ្ពើមនាងទៅៗ រហូតដល់នាងស្រាវជ្រាវដឹងថាប្តីកើតជំងឺផ្លូវចិត្តម្យ៉ាងឈ្មោះថា Obsessive compulsive disorder (OCD) ដែលធ្វើឱ្យគេគិត និងធ្វើរឿងដដែល ជាពិសេសគឺខ្លាចធូលីដី ឬមេរោគដែលមើលមិនឃើញ។ ចុងក្រោយនាងបានតែបៀមទុក្ខ ហើយមិនដឹងថាគួរបន្ត ឬបញ្ចប់ជាមួយជីវិតគូនេះនោះទេ៕

ប្រភព៖ Kapook