ចេញពីក្លិប PSG កីឡាករ Messi សម្រេចចូលក្លិប Inter Miami ក្រោយបំណងទៅក្លិបចាស់មិនអាចទៅរួច
ក្លិបបាល់ទាត់ Paris Saint German នៅក្របខ័ណ្ឌ Ligue 1 នៃប្រទេសបារាំង នៅថ្ងៃទី ០៧ ខែមិថុនា ឆ្នាំ ២០២៣ បានបង្ហោះវីដេអូចុងក្រោយ ដើម្បីជាការអរគុណដល់កីឡាករ Lionel Messi បន្ទាប់ពីការប្រកាសជាផ្លូវការ ក្នុងការចែកផ្លូវពីក្លិបតាមរយៈ Free Agent នាពេលថ្មីៗនេះ។
ចំពោះការចាកចេញនេះទៀតសោត បើតាមអ្នកកាសែតកីឡាបរទេសដ៏ល្បីល្បាញលោក Fabrizio Romano បានបញ្ជាក់ឱ្យដឹងថា Lionel Messi នឹងលេងនៅក្លិប Inter Miami នៃលីគ MLS របស់អាមេរិក នៅរដូវកាលក្រោយ ហើយការប្រកាសពីសាមីខ្លួនផ្ទាល់នឹងធ្វើឡើងឆាប់ៗនេះ។
មុននឹងឈានដល់ការព្រមព្រៀងទៅកាន់ក្លិប Miami ទឹកដីអាមេរិក Messi ក៏មានចិត្តចង់ត្រឡប់ទៅក្លិបចាស់ FC Barcelona របស់ខ្លួនផងដែរ ប៉ុន្តែការព្រមព្រៀងពុំអាចទៅរួច ទើបលោកសម្រេចចិត្តចុះហត្ថលេខាជាមួយក្លិបរបស់ David Beckham តែម្ដង។ ជាក់ស្ដែងបើតាមការឱ្យដឹងពីលោក Fabrizio Romano កីឡាករ Messi បាននិយាយថា ៖ «ខ្ញុំបានទទួលការដេញថ្លៃពីក្លិបអឺរ៉ុបផ្សេងទៀត ប៉ុន្តែខ្ញុំមិនបានគិតដល់សំណើទាំងនោះទេ ព្រោះគំនិតតែមួយគត់របស់ខ្ញុំគឺចង់ទៅចូលរួម Barcelona នៅអឺរ៉ុប តែដោយសារកិច្ចព្រមព្រៀងជាមួយ Barça ពុំអាចទៅរួច ខ្ញុំចង់សាកល្បងអ្វីដែលប្លែកនៅ Miami ឥឡូវនេះ»។
សូមរំឭកផងដែរថា ក្នុងការរួមដំណើរជាមួយក្លិបបាល់ទាត់ Paris Saint German នៅឯប្រទេសបារាំង Messi រកបាន ៣២ គ្រាប់ ៣៤ assists ក្នុង ៧៥ ប្រកួត៕
