ព្រឹត្តិការណ៍ប្រកួតកីឡា ស៊ីហ្គេម ឆ្នាំ ២០២៣ នេះ កាន់តែខិតជិតមកដល់ហើយ ហើយសម្រាប់ឆ្នាំ ២០២៣ នេះ កម្ពុជាគឺទទួលបានសិទ្ធិធ្វើជាម្ចាស់ផ្ទះ ជាមួយនឹងរៀបចំនូវប្រភេទកីឡាជាច្រើនសម្រាប់ធ្វើការប្រកួតប្រជែងដណ្តើមមេដាយ។
យ៉ាងណាមិញ ថ្មីៗនេះមានការចាប់អារម្មណ៍មួយ ខណៈកម្ពុជាគឺជាម្ចាស់ផ្ទះនៃព្រឹត្តិការប្រកួតកីឡា ស៊ីហ្គេម ឆ្នាំ ២០២៣ នេះ កម្ពុជាក៏បានសម្រេចផ្លាស់ប្តូរឈ្មោះកីឡាប្រដាល់ពី «មួយថៃ» ទៅជា «គុនខ្មែរ» ផងដែរ។ ចំពោះការផ្លាស់ប្តូរនេះ បានធ្វើឱ្យខាងសហព័ន្ធកីឡាប្រដាល់ «មួយថៃ» ផ្ទុះការប្រតិកម្មយ៉ាងខ្លាំង និង បានបញ្ជាក់ថា ថៃនឹងមិនបញ្ជូនអត្តពលិក Muay Thai ទៅចូលរួមស៊ីហ្គេមឆ្នាំ ២០២៣ ដោយព្រមានថាប្រទេសណាដែលបញ្ជូនអត្តពលិកទៅចូលរួមការប្រកួត «គុនខ្មែរ» ក្នុងស៊ីហ្គេមនេះ នឹងត្រូវហាមប្រាមពីសហព័ន្ធ Muay Thai អន្តរជាតិក្នុងព្រឹត្តិការណ៍ផ្សេងៗ។
ពាក់ព័ន្ធរឿងនេះដែរ លោក វ៉ាត ចំរើន អគ្គលេខាធិការគណៈកម្មាធិការអូឡាំពិកកម្ពុជា ឬ ហៅកាត់ថា CAMSOC បានឱ្យដឹងថា អ្នករៀបចំស៊ីហ្គេមមិនមានការព្រួយបារម្ភចំពោះការសម្រេចចិត្តពីប្រទេសថៃរឿងមិនបញ្ចូនអត្តពលិកមកនោះទេ ដោយនោះគឺជាសិទ្ធិរបស់គេ ហើយកម្ពុជាក៏នឹងត្រៀមរៀបចំការប្រកួត «គុនខ្មែរ» ឱ្យខាងតែបាន។
ទោះជាយ៉ាងនេះក្តី មកដល់ពេលនេះកម្ពុជាបានបញ្ជាក់ដែរថា មានប្រទេសចំនួន ៦ ហើយ បានសម្រេចចិត្តចូលរួមប្រកួត គុនខ្មែរ ដោយប្រទេសទាំងនោះរួមមាន ប្រទេសឥណ្ឌូណេស៊ី វៀតណាម ហ្វីលីពីន ឡាវ មីយ៉ាន់ម៉ា និង ម៉ាឡេស៊ី។
បន្ថែមពីលើនេះ អគ្គលេខាធិការគណៈកម្មាធិការអូឡាំពិកកម្ពុជា ឬ CAMSOC ក៏បង្ហើបដែរថា ក្នុងព្រឹត្តិការណ៍កីឡា ស៊ីហ្គេម ឆ្នាំ ២០២៥ ដែលប្រទេសថៃធ្វើជាម្ចាស់ផ្ទះនោះ កម្ពុជាក៏នឹងមិនបញ្ជូនអត្តពលិកទៅចូលរួមការប្រកួត «មួយថៃ» ដូចគ្នា៕
