កូឡុំប៊ី ក្លាយជាប្រទេសដំបូងនៅអាមេរិកឡាទីន ប្ដូរឈ្មោះពហុកីឡដ្ឋានដាក់តាមស្ដេចបាល់ទាត់ Pele
ប្រទេសកូឡុំប៊ី បានក្លាយជាប្រទេសនៅអាមេរិកខាងត្បូងដំបូងគេ ដែលកែប្រែឈ្មោះពហុកីឡដ្ឋានមួយតាមស្ដេចបាល់ទាត់ Pele។
កាលពីថ្ងៃទី ០៤ ខែមករា ឆ្នាំ ២០២៣ កន្លងទៅ អភិបាលខេត្ត Meta លោក Juan Guillermo Zuluaga បានធ្វើការប្រកាសលើបណ្ដាញសង្គម Twitter របស់លោកថា ពហុកីឡដ្ឋាន Villavicencio Municipal នឹងត្រូវប្ដូរឈ្មោះថា Bello Horizonte ‘Rey Pele’ ដើម្បីឱ្យក្មេងៗជំនាន់ក្រោយបានដឹងពីនិមិត្តសញ្ញានៃបាល់ទាត់ពិភពលោក។
គួរបញ្ជាក់ថា ពហុកីឡដ្ឋាន Villavicencio បានបើកសម្ពោធដាក់ឱ្យប្រើប្រាស់ក្នុងឆ្នាំ ១៩៥៨ ដោយពហុកីឡដ្ឋាននេះអាចដាក់មនុស្សបាន ១៥ ០០០ នាក់។ ជាមួយនឹងការប្រកាសផ្លាស់ប្ដូរឈ្មោះនេះ គឺបានធ្វើឱ្យប្រទេសកូឡុំប៊ី ក្លាយជាប្រទេសនៅអាមេរិកឡាទីនដំបូងគេបង្អស់ ដែលប្ដូរឈ្មោះពហុកីឡដ្ឋានរបស់ខ្លួនតាមស្ដេចបាល់ទាត់ប្រេស៊ីល Pele៕
