ចិត្តសឿងណាស់! ហ៊ានគេចសាលាទៅចូលដៃនឹងក្រុមចោរ លួចនាឡិកាដៃសរុបជាលុយជិត ៥០ ម៉ឺនដុល្លារ
បើតាមសារព័ត៌មាន HK01 និង The Standard បានឱ្យដឹងថា កាលពីថ្ងៃទី ១១ ខែកញ្ញា កន្លងទៅ មានហេតុការណ៍ចោរចំនួន ៣ នាក់ កាន់ពូថៅ និង ញញួរ ទៅវាយកម្ទេចទូរកញ្ចក់ដាក់តាំងនាឡិកាដៃ ក្នុងហាងនាឡិកាទំនើបមួយកន្លែងនៅ Canton Road ក្រុងហុងកុង លួចនាឡិកាចំនួន ២០ គ្រឿង ដែលគិតជាប្រាក់ចំនួន ៣.៧ លានដុល្លារហុងកុង (ប្រមាណជាង ៤៧ ម៉ឺនដុល្លារ)។
តាមព័ត៌មានបានឱ្យដឹងទៀតថា ក្នុងចំណោមចោរទាំង ៣ នាក់ មាន ២ នាក់ជាក្មេងប្រុសអាយុត្រឹម ១០ និង ១៤ ឆ្នាំ ដោយពួកគេទាំងពីរ មកធ្វើសកម្មភាពលួចទាំងខ្លួនឯងស្ថិតក្នុងឯកសណ្ឋានសិស្ស ពាក់អាវបិទបាំងពីក្រៅ។ ក្នុងនោះដែរ ក្មេងប្រុសអាយុ ១០ ឆ្នាំ ជាជនជាតិប៉ាគីស្ថាន ត្រូវបានគេជួលក្នុងប្រាក់ចំនួន ៥០០០ ដុល្លារហុងកុង (៦៣៩ ដុល្លារ) ឱ្យគេគេចសាលា មកចូលដៃដើម្បីលួចទ្រព្យរបស់គេនេះ។
ចំពោះនាឡិកាដែលលួចយកទៅនោះ ត្រូវបានប៉ូលិសរឹបអូសបានវិញហើយ ដោយពួកគេបានដាក់ក្នុងកាតាប យកទៅលាក់នៅក្នុងព្រៃនៃតំបន់ Kowloon Peak៕
