អាជ្ញាធរអេស្ប៉ាញ នាំគ្នាចុះជួយខ្លាឃ្មុំកម្សត់ ក្បាលជាប់នឹងធុងប្លាស្ទិក អត់បានស៊ីចំណី ខ្លួនស្គមស្គាំងគួរឱ្យអាណិត
ថ្មីៗនេះ អាជ្ញាធរប្រទេសអេស្ប៉ាញ បានចុះទៅជួយសត្វខ្លាឃ្មុំមួយក្បាល ដែលមានក្បាលជាប់នឹងធុងប្លាស្ទិក ធ្វើឱ្យវាអត់បានស៊ីចំណីជាច្រើនថ្ងៃ ធ្លាក់ខ្លួនស្គមយ៉ាងគួរឱ្យអាណិត។
តាមព័ត៌មានបានឱ្យដឹងថា ខ្លាឃ្មុំមួយក្បាលនេះ ត្រូវបានប្រទះឃើញ ដោយបុរសម្នាក់ នៅភាគខាងលិចក្រុង ។ បុរសរូបនេះ បានរៀបរាប់ឱ្យដឹងថា ខណៈខ្លួនកំពុងដើរលេងនៅជិតផ្ទះសុខៗ ក៏បានឃើញសត្វខ្លាឃ្មុំមួយក្បាល មើលទៅខុសធម្មតា ព្រោះវាមានធុងប្លាស្ទិកធំមួយនៅជាប់ក្បាលរបស់វា វាដើរចុះដើរឡើង រអិលដួលគួរឱ្យអាណិត ទើបគេទូរស័ព្ទទៅកាន់អាជ្ញាធរនៅមូលនីធិ Brown Bear តែម្តង។
យ៉ាងណាមិញ ខាងអាជ្ញាធរក៏បានចុះមកដល់កន្លែង រួចបានប្រើការបាញ់ថ្នាំសន្លប់ ដើម្បីចាប់វា ហើយក៏បានដោះធុងនោះចេញ និង ពាក់ក្រឡៅក GPS ដើម្បីតាមដានវាទៀតផង ចុងក្រោយទើបចាក់ថ្នាំឱ្យវាដឹងខ្លួនឡើងវិញ និង ចាំមើលវារហូតដល់វាចូលទៅក្នុងព្រៃវិញ។
ដោយឡែក បើតាមការឱ្យដឹង ខ្លាឃ្មុំនេះមានទម្ងន់ ៩៨.៥ គីឡូក្រាម ដែលជាទម្ងន់តិចបំផុតសម្រាប់ខ្លាឃ្មុំទូទៅ ព្រោះវាជាប់ក្បាលនៅក្នុងធុងប្លាស្ទិកយូរថ្ងៃ ធ្វើឱ្យអត់អាហារ និង ទឹកទៅតាមនោះដែរ។ តែជាសំណាងល្អ វានៅរឹងមាំនៅឡើយ ឯមូលហេតុដែលធ្វើឱ្យវាជាប់ក្បាលក្នុងនោះវិញ គេសង្កេតឃើញថានៅក្នុងធុងនោះមានគ្រាប់ពោត វាអាចនឹងប្រឹងយកក្បាលចូលទៅស៊ី ទើបធ្វើឱ្យជាប់បែបនេះ៕
