(វីដេអូ) រពិសដៃពេក! អ្នកដំណើរម្នាក់ត្រូវបានឃាត់ខ្លួនភ្លាម ក្រោយបើកទ្វារយន្តហោះបង្កឱ្យមានការភ័យស្លន់ស្លោ
កាលពីយប់ថ្ងៃទី ២៦ ខែឧសភា ឆ្នាំ ២០២៣ កន្លងទៅសារព័ត៌មាន Reuters បានចុះផ្សាយថា មន្ត្រីប៉ូលិសកូរ៉េខាងត្បូងនៅថ្ងៃសុក្រនេះ បានឃាត់ខ្លួនបុរសម្នាក់ ដែលបានបើកទ្វារយន្តហោះ Asiana Airlines (020560.KS) នៅប៉ុន្មាននាទីមុនពេលចុះចតនៅទីក្រុង Daegu ដែលបង្កឱ្យអ្នកដំណើរជាច្រើនភ័យស្លន់ស្លោ។
យន្តហោះ Airbus A321-200 បានចុះចតដោយសុវត្ថិភាពនៅម៉ោងប្រហែល ១២:៤០ យប់ (ម៉ោងនៅកូរ៉េ) ក្រោយពីវាបានចេញដំណើរពីកោះ Jeju ដោយមន្ត្រីនាយកដ្ឋានពន្លត់អគ្គីភ័យទីក្រុង Daegu បាននិយាយថា អ្នកដំណើរចំនួន ៩ នាក់ ដែលជាក្មេងជំទង់ទាំងអស់ត្រូវបានបញ្ជូនទៅមន្ទីរពេទ្យភ្លាមៗពេលចុះចត ក្រោយពីមានបញ្ហាផ្លូវដង្ហើម។
ជាមួយគ្នានេះដែរ អ្នកដំណើរម្នាក់បាននិយាយថា បុគ្គលិកក្នុងកាប៊ីនបានធ្វើការប្រកាសនៅលើយន្តហោះ ដោយសួរថាតើមានគ្រូពេទ្យនៅលើយន្តហោះឬអត់? ហើយវីដេអូមួយ ដែលត្រូវបានចាក់ផ្សាយតាមកញ្ចក់ទូរទស្សន៍ត្រូវបានគេរាយការណ៍ថា ត្រូវបានថតដោយអ្នកដំណើរម្នាក់ បង្ហាញពីពេលមុនពេលចុះចត ដោយទ្វារយន្តហោះបានរបើកចំហបណ្ដាលឱ្យមានខ្យល់បក់ចូល ធ្វើឱ្យអ្នកដំណើរអង្គុយក្បែរនោះសន្លប់។
ដោយឡែក ខាងក្រសួងដឹកជញ្ជូនកូរ៉េខាងត្បូង បាននិយាយនៅក្នុងសេចក្តីថ្លែងការណ៍មួយថា ៖ «ប៉ូលិសបានចាប់ខ្លួនបុរស ដែលបានបើកទ្វារយន្តហោះនោះហើយ ពេលនេះអាជ្ញាធរកំពុងស៊ើបអង្កេតការរំលោភលើច្បាប់សុវត្ថិភាពអាកាសចរណ៍» ដោយបានបន្ថែមថា ៖ «អាជ្ញាធរក៏កំពុងពិនិត្យមើលថា តើក្រុមហ៊ុនអាកាសចរណ៍ Asiana បានអនុវត្តតាមគោលការណ៍គ្រប់គ្រងទ្វារចេញក្នុងគ្រាអាសន្នដែរឬទេ»។
ទន្ទឹមនឹងនោះ អ្នកនាំពាក្យរបស់ក្រុមហ៊ុន Asiana បាននិយាយថា ៖ «យន្តហោះមានរយៈពេល ២ ទៅ ៣ នាទីពីការចុះចត នៅពេល ដែលអ្នកដំណើរប្រុសអង្គុយក្បែរច្រកចេញសង្គ្រោះបន្ទាន់បានបើកទ្វារ ជាមួយនឹងចម្ងាយប្រហែល ២០០ ម៉ែត្រពីដី» ដោយអ្នកនាំពាក្យរូបនេះបាននិយាយទៀតថា ៖ «អ្នកជិះលើយន្តហោះទាំងអស់ត្រូវបានអង្គុយដោយដាក់ខ្សែក្រវាត់សុវត្ថិភាព ព្រោះយន្តហោះជិតនឹងចុះចត។ ហើយពេលកើតហេតុ រូបភាពបានបង្ហាញទ្វារសង្គ្រោះបន្ទាន់ចំហក្បែរស្លាបឆ្វេងរបស់យន្តហោះ»។
យ៉ាងណាមិញ លោក Sohn Myong-hwan សាស្ត្រាចារ្យនៅនាយកដ្ឋានថែទាំអាកាសចរណ៍នៃសាកលវិទ្យាល័យ Sehan របស់ប្រទេសកូរ៉េខាងត្បូង បានលើកឡើងថា ៖ «វាមានគ្រោះថ្នាក់ណាស់ ជាពិសេសក្នុងអំឡុងពេលចុះចត និង ហោះឡើង ដូច្នេះបើសិនមាននរណាម្នាក់ក្រៅពីបុគ្គលិកជើងហោះហើរ គួរតែបញ្ឈប់អ្នកដំណើរនោះ» ដោយបានបន្ថែមទៀតថា ៖ «សម្រាប់ខ្ញុំ វាហាក់ដូចជាពិបាកសម្រាប់ក្រុមហ៊ុនអាកាសចរណ៍ អាចគេចមិនផុតពីការទទួលខុសត្រូវដ៏ធ្ងន់ធ្ងរមួយនេះណាស់»៕
ប្រភព ៖ Reuters
