អ្នកលក់អនឡាញល្បី ម៉ាដាមយ៉ូ ឆ្លើយតបក្រោយផ្ទុះរឿងកូនតុងទីនប្រកាសទារលុយសរុបប្រមាណ ១ លានដុល្លារ
ថ្មីៗនេះ មហាជនអ្នកលេងបណ្តាញសង្គមហ្វេសប៊ុកកំពុងផ្ទុះការចាប់អារម្មណ៍យ៉ាងខ្លាំង ក្រោយពីមានការបង្ហោះសារ និង រូបភាពរបស់អ្នកលក់អនឡាញល្បីឈ្មោះ Maadam Yoo ពាក់ព័ន្ធនឹងរឿងលុយកាក់ និង ប្រាក់តុងទីន។
តាមរយៈការបង្ហោះជាបន្តបន្ទាប់របស់គណនីហ្វេសប៊ុកផ្សេងៗគ្នា បានបង្ហោះសារក្នុងន័យដូចគ្នា ដោយប្រកាសឱ្យអ្នកលក់អនឡាញ Maadam Yoo ចេញមុខមកដោះស្រាយពាក់ព័ន្ធរឿងលុយតុងទីន និង បញ្ជាក់ថាមានជនរងគ្រោះដល់ទៅប្រមាណជិត ១០០ នាក់ ក្នុងចំនួនប្រាក់ប្រមាណ ១ លានដុល្លារ។ មិនតែប៉ុណ្ណោះ មានអ្នកលេងតុងទីនជាច្រើនបានប្រកាសថា ពេលនេះកុំយកលុយគេទៅចាយស្រួលពេក គេចមុខបាត់អ៊ីចឹងអី សុំឱ្យខ្ញុំទុកពេលឱ្យរហូតដល់ប្លុកខ្លួនឯងចោលបាត់ទៀត។
យ៉ាងណាមិញ ក្រោយពីមានការផ្ទុះការទារប្រាក់ជាបន្តបន្ទាប់ពីអ្នកលក់អនឡាញល្បី Maadam Yoo ស្រាប់តែនៅយប់ថ្ងៃទី ៣០ ខែមីនា ឆ្នាំ ២០២៣ ក៏មានគណនីហ្វេសប៊ុកមួយ បានចេញមកទម្លាយសារនៅក្នុង Group លើបណ្តាញសង្គមហ្វេសប៊ុកទំនងជា Maadam Yoo ដោយបានសរសេរឆ្លើយតបថា ៖ «សារពី Maadam Yoo ឆ្លើយតបទៅនឹងអ្នកដែលថាខ្ញុំបោកលុយកូនតុងទីនរាប់ $លាន ហើយសួរថាលុយទាំងអស់នោះបាត់ទៅណា? ខ្ញុំបានបង្កើតខ្សែតុងទីនដេញប្រចាំថ្ងៃ $១០០ ការ $១៥ $២០០ ការ $៣០ $៣០០ $៤៥ បើគិតមកដល់ពេលនេះគឺជិតមួយឆ្នាំហើយ ហើយខ្ញុំបានបង្កើត system មួយដើម្បីជួយដល់កូន ដែលមានលុយមកលេងអាចស៊ីការបានរហូតដល់កើប គឺនៅពេលដែលគ្មានអ្នកដេញការនៅក្នុងគ្រុប យើងនឹងធ្វើការចាប់ឆ្នោត តែឈ្មោះអ្នកដែលចាប់ឆ្នោតបានគាត់មិនយកក៏បាន គឺអាចទុកដល់កើប ហើយមេសុខចិត្តយកឈ្មោះនោះខាត់ជំនួស ហើយយកលុយនោះទៅដាក់ចងការបន្តឱ្យអ្នកទី ៣។ ការធ្វើបែបនេះ ព្រោះតែចង់ជួយឱ្យអ្នកដែលមានលុយលេងស៊ីការ គាត់មិនបារម្ភថាពេលលេងទៅគាត់អាចនឹងត្រូវចាប់ឈ្មោះខាតការពាក់កណ្តាលទី ៣៥x$៨៥ =$២៩៧៥ ហើយនៅថ្ងៃកើប ខ្ញុំត្រូវបង់ឱ្យកូនម្នាក់នោះវិញ $៣៥០០ (មេចេញខាត $៥២៥) តែកូនដែលចាប់ឆ្នោតបាន គាត់នៅតែបង់រស់ធម្មតា គឺបង់ $៨៥ តែឈ្មោះរបស់គាត់ងាប់ នោះមេត្រូវបង់បន្ថែម $១៥ ថែមទៀត ដែលជាចំណាយ ដែលខ្ញុំខ្លួនឯងក៏មិនដឹងខ្លួនដែរ។ អ៊ីចឹងក្នុងមួយក្បាល ខ្ញុំត្រូវបង់ $១៥ រយៈពេល ៣៥ ថ្ងៃ បន្ថែមទៀត គឺ $៥២៥ ទៀត សរុបទាំងមុនទាំងក្រោយ គឺខាតការពីរតង់ $៥២៥ + $៥២៥ = $១០៥០ ក្នុង ១ ក្បាល ហើយក្នុង ១ ខ្សែពេលខ្លះមានអ្នកមិនយកដល់ ២៥ នាក់ ចឹងគ្រាន់តែលុយដែលខ្ញុំខាត ក្នុង ១ ខ្សែ គឺ $១០៥០ x ២៥ នាក់ = $២៦២៥០ ហើយក្នុងមួយខ្សែពេលខ្លះ មាន ៨ ក្បាលឡើងដំណាលគ្នា ($២៦២៥០x៨= $២១០០០០) ដកលុយទឹក និង លុយចងការ ដែលទទួលបាន ក៏នៅខាតយ៉ាងតិច $១០០០០០ ទៅ $១៥០០០០ ដែរក្នុង ៣៦ ថ្ងៃ ហើយទម្រាំតែដឹងខ្លួនថាធ្វើខុស គឺអ្វីៗហួសពេលលែងអាចដោះស្រាយអ្វីបានហើយ។ ខ្ញុំបានព្យាយាមយកលុយក្នុងផ្ទះផ្ទាល់ខ្លួន និង លុយពីបងប្អូនរបស់ខ្ញុំ មកចាក់បំពេញការខាតនេះអស់ជាង $៥០ ម៉ឺន ដោយគិតថាអាចស្រោចស្រង់បាន តែជាក់ស្តែងវាមិនអាចស្រោចស្រង់បានទេ ព្រោះការខាតបង់នេះវាមិនមែនត្រឹមតែកូនខូច និង លុយចងការខូចទេ តែដោយសារតែការដើរ System ខុសដោយមិនដឹងខ្លួន ហើយចុងក្រោយខ្ញុំត្រូវរលាយអស់គ្រប់យ៉ាង រួមទាំងលុយរបស់កូនៗដែលលេងជាមួយដែរ។ បើនិយាយពីជនរងគ្រោះ ខ្ញុំខ្លួនឯងជាអ្នករងគ្រោះខ្លាំងជាងគេក្នុងរឿងតុងទីននេះ ព្រោះត្រូវខាតបង់អស់ទ្រព្យសម្បត្តិគ្រប់យ៉ាង ខាតបង់ទាំងកិត្តិយស កេរ្តិ៍ឈ្មោះគ្រប់យ៉ាង ថែមទាំងត្រូវរស់នៅបែកកូន បែកបាក់ឪពុកម្តាយ និយាយរួមគឺរលាយអស់គ្រប់យ៉ាងដោយសារតែតុងទីននេ។ លុយទាំងអស់ដែលបាត់ទៅ គឺបាត់ទៅលើការយកលុយខាតការពីខ្សែថ្មី មកបើកអោឱ្យខ្សែចាស់ដែលកើប ដែលប្រៀបដូចយកទឹកកន្លះកែវពីកែវថ្មី មកចាក់អោយពេញកែវចាស់ ចាក់យូរៗទៅ កែវទទេរកាន់តែច្រើនឡើងៗ ហើយក៏ដួលទៅទាំងជំហរ»៕
សូមមើលសារឆ្លើយតប៖
