ទីបំផុតស្នងការខេត្តកណ្តាលបកស្រាយហើយ រឿងប៉ូលិសឃាត់ឡានមួយនៅខាងកើតសាលាស្រុកស្អាង

ថ្មីៗនេះ មានគណនីហ្វេសប៊ុកមួយឈ្មោះ នង សុខហៀង បានបង្ហោះករណីលោកដែលត្រូវបានប៉ូលិសចរាចរណ៍មួយក្រុម បានឃាត់រថយន្តលោកនៅទីតាំងខាងកើតសាលាស្រុកស្អាង ស្រុកកោះធំ ចម្ងាយ ២០០ ម៉ែត្រ បង្កជាការតវ៉ាភ្ញាក់ផ្អើលពេញបណ្ដាញសង្គម ខណៈភាគីម្ខាងៗអះអាងរកត្រូវរៀងៗខ្លួន។

យ៉ាងណាមិញ ក្រោយមានរឿងបែបនេះ ក្រុមការងារប្រតិកម្មរហ័សនៃស្នងការដ្ឋាននគរបាលខេត្តកណ្តាល មានកិត្តិយសបំភ្លឺជូនសាធារណជន និង មានការសោកស្តាយចំពោះការចុះត្រួតពិនិត្យស្តីពីការអនុវត្តច្បាប់ចរាចរណ៍ផ្លូវគោករបស់មន្រ្តីនគរបាលចរាចរណ៍ ធ្វើឱ្យប៉ះពាល់ដល់អ្នកធ្វើដំណើរតាមដងផ្លូវ និង សូមការយោគយល់អធ្យាស្រ័យពីសំណាក់ម្ចាស់គណនីហ្វេសប៊ុក និង ម្ចាស់រថយន្តខាងលើ ក៏ដូចជាសាធារណជនដែលប្រើប្រាស់បណ្តាញសង្គម។

ខាងស្នងការបានបន្តថា ចំពោះមន្រ្តីនគរបាលដែលអនុវត្តច្បាប់ចរាចរណ៍ផ្លូវគោកលើសពីតួនាទីភារកិច្ច ស្នងការដ្ឋាននគរបាលខេត្ត នឹងធ្វើការស្រាវជ្រាវឱ្យបានល្អិតល្អន់ប្រសិនជាពិនិត្យឃើញមានការអនុវត្តខុសតួនាទីភារកិច្ចពិតមែន ចាត់វិធានការអនុវត្តវិន័យកងកម្លាំងនគរបាលជាតិ។

ទន្ទឹមនេះ ខាងស្នងការបានបញ្ជាក់ឱ្យដឹងថា បន្ទាប់ពីមានការប៉ះទង្គិចពាក់សម្តីរវាងសមត្ថកិច្ច និង អ្នកបើកបររថយន្ត ស្រ្តីដែលជាប្រពន្ធអ្នកបើកបររថយន្តរួមដំណើរជាមួយគ្នា បានទទួលស្គាល់កំហុសថាខ្លួនពិតជាមិនបានពាក់ខ្សែក្រវ៉ាត់ និង សុំទោសសមត្ថកិច្ចដោយផ្ទាល់មាត់។ បន្ទាប់មកសមត្ថកិច្ចបានអប់រំបន្ថែមអនុញ្ញាតឱ្យធ្វើដំណើរបន្តដោយមិនបានផាកពិន័យនោះទេ។ អាស្រ័យហេតុនេះ សូមសាធារណជនមេត្តាជ្រាប៕