រៀងរាល់ថ្ងៃឈប់សម្រាកពីការងារ ក៏ដូចជាថ្ងៃចុងសប្ដាហ៍ ប្រិយមិត្តមួយចំនួនប្រាកដជាមានអារម្មណ៍ថាខ្ជិលក្នុងការធ្វើដំណើរផ្លូវឆ្ងាយដើម្បីទៅលម្ហែកាយ ដោយចង់តែទៅកម្សាន្តកន្លែងទេសចរណ៍ទាំងឡាយណាដែលនៅជិតៗក្រុង និង មានបរិយាកាសស្រស់ស្រាយបែបធម្មជាតិ កាត់បន្ថយសម្ពាធការងារ បន្ធូរស្ដ្រេសជាដើម។
ថ្ងៃនេះ «ប្រជាប្រិយ» សូមលើកយកនូវទីតាំងលម្ហែកម្សាន្តថ្មីមួយ ដែលមានទីតាំងនៅជិតរាជធានីភ្នំពេញ ងាយស្រួលក្នុងការធ្វើដំណើរទៅកម្សាន្តនៅថ្ងៃសម្រាក ដែលនៅទីនោះមានឈ្មោះថា «រមណីយដ្ឋានអាណាចក្រដូង»។
រមណីយដ្ឋានអាណាចក្រដូង មានទីតាំងនៅជិតរាជធានីភ្នំពេញ ដោយចំណាយពេលធ្វើដំណើរត្រឹមតែ ៣០ នាទី ស្ថិតនៅតាមផ្លូវជាតិលេខ 5 ភូមិត្រពាំងបួន ឃុំស្វាយ ស្រុកសាមគ្គីមានជ័យ ជាប់ព្រំប្រទល់ ខេត្តកំពង់ស្ពឺ និង ខេត្តកំពង់ឆ្នាំង។
នៅទីនោះ ជាកន្លែងលម្ហែដ៏ស្ងប់ស្ងាត់ ដែលសម្បូរទៅដោយដើមដូងជាច្រើន ជាម្លប់ដល់កញ្ចុះដែលសង់នៅជាប់មាត់ទឹកខៀវស្រងាត់ ស័ក្តសមសម្រាប់ការអង្គុយទទួលទានអាហារឆ្ងាញ់ៗជួបជុំគ្រួសារ សាច់ញាតិ និងមនុស្សជាទីស្រឡាញ់ គួរជាទីស្រស់ត្រកាលក្រៃលែង៕
រូបភាព ៖ រមណីយដ្ឋានអាណាចក្រដូង
