ផ្ទុះកូវីដឡើងវិញលើកនេះ ជប៉ុន ពិបាកគ្រប់គ្រងការព្យាបាល ព្រោះអ្នកឆ្លងភាគច្រើនជាមនុស្សចាស់មានជំងឺប្រចាំកាយ
សារព័ត៌មាន The Japan Times បានចុះផ្សាយកាលពីថ្ងៃទី ០១ កុម្ភៈ ឆ្នាំ ២០២៣ កន្លងទៅថា បើលើកឡើងពីការកាត់បន្ថយកុំឱ្យមានអ្នកស្លាប់ដោយសារកូវីដ-១៩ នៅពេលនេះ ប្រទេសជប៉ុន លែងជាប្រទេសដែលមានការគ្រប់គ្រងល្អបំផុតទៀតហើយ ព្រោះប្រទេសនេះមានប្រជាជនមានវ័យចំណាស់ជាងគេបំផុតនៅលើពិភពលោក ស្របពេលកំពុងជួបប្រទះការផ្ទុះឡើងវិញនៃការឆ្លងជំងឺកូវីដ-១៩។
នៅក្នុងរដូវងានេះ ប្រទេសជប៉ុន កំពុងជួបបញ្ហាការកើនឡើងនៃការឆ្លងមេរោគអូមីក្រុង ដោយបានកត់ត្រាការស្លាប់ប្រចាំថ្ងៃកើនដល់កម្រិតខ្ពស់បំផុត គឺច្រើនជាង ៥០០ នាក់កាលពីថ្ងៃទី ១៤ ខែមករា ឆ្នាំ ២០២៣ កន្លងទៅនេះ។ ការកើនឡើងនេះដែរ ក៏បានជំរុញឱ្យអត្រាមរណភាពសរុបក្នុងប្រទេសជប៉ុន ឡើងលើសប្រទេស នូវែលសេឡង់ ទៀតផង។ លើសពីនេះទៅទៀត លោក Norio Ohmagari ប្រធានមជ្ឈមណ្ឌលប្រយុទ្ធប្រឆាំងជំងឺឆ្លងបាននិយាយថា ៖ «ចំនួនអ្នកឆ្លងទំនងជានឹងកើនឡើងលឿនជាងប្រទេសដទៃទៀតចាប់ពីពេលនេះតទៅ ព្រោះប្រទេសជប៉ុន មានប្រជាជនវ័យចំណាស់ច្រើន ដូច្នេះ សមាមាត្រនៃមនុស្សមានហានិភ័យនៃការស្លាប់នឹងកាន់តែច្រើនឡើង ដែលអាចនិយាយបានថា ជប៉ុន នឹងស្ថិតក្នុងចំណោមប្រទេសមានអត្រាមរណភាពខ្ពស់»។
គួរបញ្ជាក់ដែរថា ប្រទេសជប៉ុន គឺជាប្រទេសមួយក្នុងចំណោមប្រទេស ដែលមានវ័យចំណាស់បំផុតនៅលើពិភពលោក។ ជាក់ស្ដែង មនុស្សដែលមានអាយុលើសពី ៦៥ ឆ្នាំមានចំនួន ២៩ ភាគរយនៃប្រជាជនចំនួន ១២៥ លាននាក់ ហើយក្រុមនេះស្ថិតក្នុងចំណោមក្រុមមនុស្សមានហានិភ័យខ្ពស់បំផុតសម្រាប់ជំងឺកូវីដ-១៩ ដោយរបាយការណ៍លើកឡើងដែរថា ក្នុងចំណោមអ្នកដែលបានស្លាប់ក្នុងការផ្ទុះរលកថ្មីនេះ គឺជាអ្នកដែលមានជំងឺប្រចាំកាយដូចជា ជំងឺភ្លេចភ្លាំង និង ជំងឺបេះដូងជាដើម។
មិនតែប៉ុណ្ណោះ ប្រទេសជប៉ុន ក៏បានចាត់ថ្នាក់ជំងឺកូវីដ-១៩ ថាជា ជំងឺធ្ងន់ធ្ងរ ដូចនឹង ជំងឺរបេង ឬជំងឺគ្រុនផ្តាសាយបក្សីដែរ។ លោក Kenji Shibuya ដែលជាអ្នកជំនាញខាងរោគរាតត្បាតនៅមូលនិធិ Tokyo Foundation for Policy Research បាននិយាយថា មន្ទីរពេទ្យគឺកើនអ្នកជំងឺកូវីដ-១៩ យ៉ាងឆាប់រហ័ស ក្នុងអំឡុងពេលនៃការផ្ទុះឆ្លងថ្មី ដែលចាប់កើតឡើងវិញតាំងពីខែតុលា ឆ្នាំ ២០២២ កន្លងទៅនេះ។
បន្ថែមពីនេះ លោក Norio Ohmagari បានលើកឡើងទៀតថា ៖ «អនាគតរបស់យើងអាស្រ័យលើរបៀបដែលមនុស្សចាស់ការពារខ្លួន ហើយប្រសិនបើមនុស្សផ្សេងទៀតចេះសហការគ្នានោះ ខ្ញុំសង្ឃឹមដោយស្មោះថានឹងមិនមានការបែកបាក់គ្នានៅក្នុងសង្គមនេះទេ»៕
ប្រភព៖ The Japan Times
