ចូលហាងប្រ៊េន ហើយត្រូវគេមើលលើមើលក្រោមពេក មានអីពីរអ្នកម្ដាយកូនទរជះលុយទិញសឹងផ្អៀងហាង
រឿងរ៉ាវអ្នកលក់មិនឱ្យតម្លៃ មើលលើក្រោមអ្នកទិញហាក់កើតមានជារឿយៗ បើទោះបីជាមានការរិះគន់ម្ដងជាពីរដងក្ដី តែរឿងនេះនៅតែអាចកើតមានឡើងក្នុងរូបភាពខុសៗគ្នា។
ថ្មីៗនេះដែរ ស្ត្រីជនជាតិសិង្ហបុរីម្នាក់ដែលត្រូវបានគេស្គាល់ឈ្មោះថា Amjea បានចែករំលែកបទពិសោធដែលនាង និង ម្ដាយនាងត្រូវបានអ្នកលក់ប្រចាំហាង Dior នៅប្រទេសអ៊ីតាលីហាក់មិនឱ្យតម្លៃ ដោយគិតថាពួកគេគ្មានលុយទិញកាបូបប្រណីតទាំងនោះ។
Amjea បានរៀបរាប់ថា ៖ «អំឡុងពេលធ្វើដំណើរទៅលេងអ៊ីតាលី ម្ដាយនាងបានចូលទៅមើលកាបូបនៅហាង Dior ដោយម្ដាយនាងបានឃើញកាបូបខ្លួនពេញចិត្ត ហើយក៏បានសួរទៅអ្នកលក់ប្រចាំការនៅហាងឱ្យយកវាមកបង្ហាញឱ្យគាត់មើល តែអ្វីដែលម្ដាយនាងទទួលបានគឺអ្នកលក់រូបនោះបានបដិសេធមិនបង្ហាញកាបូបនោះឱ្យគាត់មើលហើយ ថែមទាំងមើលមកម្ដាយនាងក្នុងន័យមិនឱ្យតម្លៃ។ ហើយនៅពេលមានភ្ញៀវដទៃចូលមកអ្នកលក់រូបនោះក៏បានទុកម្ដាយនាងចោល ហើយទៅរាក់ទាក់ជាមួយភ្ញៀវផ្សេង ដោយត្រូវគេទុកចោលប្រហែល ១០ នាទី ម្ដាយនាងក៏បានចេញពីហាងនោះ»។
Amjea បន្ថែមថា ៖ «ក្រោយដឹងរឿងខ្ញុំខឹងជាខ្លាំង ខ្ញុំដឹងថាជីវិតជាអ្នកលក់នៅក្នុងហាងវាមិនមែនជាការងាយស្រួលទេ តែត្រូវចាំថាអ្នកអាចមើលងាយខ្ញុំបាន តែហាមមើលងាយម្ដាយខ្ញុំ។ ពេលនោះខ្ញុំក៏សម្រេចថានាំម្ដាយខ្ញុំទៅហាងនោះម្ដងទៀតនៅថ្ងៃស្អែក»។
ថ្ងៃបន្ទាប់ Amjea ក៏បាននាំម្ដាយនាងទៅហាង Dior ដដែល ដោយនាងសម្រេចដើរទៅរកអ្នកលក់ផ្សេងក្នុងហាងឱ្យយកកាបូបដែលម្ដាយនាងពេញចិត្តមកឱ្យគាត់មើលតែម្ដង ដោយមិនរង់ចាំអ្នកលក់ដែលមើលងាយម្ដាយនាងមករាក់ទាក់សួរនាំនោះឡើយ។ អ្នកលក់ថ្មីនេះ គឺមានអត្តចរិកល្អដល់ថ្នាក់ម្ដាយ Amjea បានសរសើរពេញចិត្តជាខ្លាំង ហើយពួកនាងក៏សម្រេចចិត្តទិញកាបូបជាច្រើនម៉ាកតាមការណែនាំ។ មិនត្រឹមតែប៉ុណ្ណឹងអ្នកលក់រូបនោះក៏បានបម្រើសេវាទឹកក្ដៅត្រជាក់ កាហ្វេឱ្យនាង និង ម្ដាយនាងផងដែរ។ លុះពេលកាបូបនាងទិញខ្ចប់រួចរាល់ ទើបនាងឃើញអ្នកលក់ដែលមើលងាយម្ដាយនាងមកនិយាយដាក់អ្នកលក់ថ្មីនេះថា «អបអរសាទរដែលលក់បាន»។
ក្រោយឃើញរឿងនេះមហាជនជាច្រើនក៏បានចូលរួមបញ្ចេញមតិដោយលើកឡើងថា ៖ «មកទល់ពេលនេះការមើលងាយអ្នកទិញនៅតែកើតមាន», «Dior គួរអប់រំបុគ្គលិកឱ្យបានល្អជាងនេះ», «ហាងនៅអ៊ឺរ៉ុបភាគច្រើនមិនឱ្យតម្លៃភ្ញៀវអាស៊ី» ជាដើម៕
ប្រភព៖ Khaosod