ដល់-ក! វៀតណាម ប្រកាសរកឃើញវីរុសប្រភេទថ្មី XBB របស់អូមីក្រុង ឆ្លងលឿនហើយអាចគេចផុតពីប្រព័ន្ធស៊ាំរាង្គកាយ

ប្រភេទវីរុស Omicron ថ្មី មានឈ្មោះថា XBB ដែលត្រូវបានគេជឿថាមាន ការឆ្លងខ្លាំង និង មានសមត្ថភាពអាចគេចផុតពីការឆ្លើយតបនៃប្រព័ន្ធភាពស៊ាំក្នុងរាងកាយ គឺត្រូវបានគេរកឃើញនៅក្នុងទីក្រុង ហូជីមិញ ប្រទេសវៀតណាម។

កាលពីថ្ងៃទី ៤ ខែមករា ឆ្នាំ ២០២៣ កន្លងទៅ មន្ទីរពេទ្យពិនិត្យជំងឺត្រូពិកនៅក្នុងទីក្រុងហូជីមិញ បានធ្វើការបញ្ជាក់ពីវត្តមានរបស់វីរុសប្រភេទថ្មីនៃជំងឺកូវីដ-១៩ នេះ នៅពេលដែលបានធ្វើតេស្តរកកូវីដ-១៩ ក្នុងចំណោមអ្នកជំងឺប្រមាណ ៥២៦ នាក់។ នេះគឺជាលើកទីមួយហើយដែលប្រទេសវៀតណាម បានកត់ត្រាជាផ្លូវការនូវវត្តមានវីរុសប្រភេទថ្មីនៃជំងឺកូវីដ-១៩ នេះ។

យ៉ាងណាមិញ វីរុស XBB ត្រូវបានរកឃើញជាលើកដំបូងកាលពីខែសីហា ឆ្នាំ ២០២២ កន្លងទៅ ហើយក្នុងរយៈពេល ៤ ខែកន្លងមកនេះ វាក៏បានរីករាលដាលដល់ប្រទេស និង ដែនដីប្រហែលជា ៧០ កន្លែង។ ឯអង្គការសុខភាពពិភពលោក WHO បាននិយាយថា វីរុសប្រភេទថ្មី XBB ក៏ដូចទៅនឹងវីរុស XBB.1.5 ដែរ។

ដោយឡែក ករណីជំងឺកូវីដ-១៩ ទាំងអស់នៅឯសហរដ្ឋអាមេរិក គឺត្រូវបានគេរកឃើញមានវីរុសប្រភេទ XBB ចំនួន ៤៤ ភាគរយ ហើយក៏កំពុងបង្កឱ្យមានរលកឆ្លងថ្មីនៅតំបន់អាស៊ីមួយចំនួនរួមទាំងប្រទេសឥណ្ឌា និង សិង្ហបុរី កាលពីខែតុលាឆ្នាំមុន។ ទោះជាយ៉ាងណាក៏ដោយ នាយកដ្ឋានសុខាភិបាលទីក្រុងហូជីមិញបាននិយាយថា ស្ថានភាពកូវីដ-១៩ បច្ចុប្បន្ន នៅតែស្ថិតក្រោមការគ្រប់គ្រង ដោយសារតែវ៉ាក់សាំងអាចការពារពីករណីធ្ងន់ និង ការស្លាប់បាន៕

ប្រភព៖ VN Express