កក់កន្លែងគេងទៅ! នៅខេត្តព្រះសីហនុ កំពុងសម្រុករៀបចំស្អាតភ្លឹង ត្រៀមសម្រាប់បុណ្យសមុទ្រ ៣ ថ្ងៃទៀត

កាលពីពេលកន្លងទៅថ្មីៗនេះ ក្រសួងទេសចរណ៍ បានជូនដំណឹងឱ្យសាធារណជនបានជ្រាបថា ពិធីបុណ្យសមុទ្រលើកទី ៩ ជុំទី ៣ នឹងប្រព្រឹត្តទៅចាប់ពីថ្ងៃទី ៩ ដល់ថ្ងៃទី ១១ ខែធ្នូ ឆ្នាំ ២០២២ ខាងមុខក្រោមប្រធានបទ «ឆ្នេរនៃសន្តិភាព ឆ្នេរនៃក្ដីសង្ឃឹម» (Bay of Peace, Bay of Hope)។

ទន្ទឹមទៅនឹងកម្មវិធីដែលកៀកខិតជិតមកដល់ នៅថ្ងៃទី ០៥ ខែធ្នូ ឆ្នាំ ២០២២ តាមរយៈផេក ប្រជាជនខេត្តព្រះសីហនុ បានបង្ហាញពីទិដ្ឋភាពមួយចំនួននៅទីតាំងដែលនឹងប្រារព្ធពិធី ព្រមទាំងបញ្ជាក់ឱ្យបានដឹងថា អាជ្ញាធរ និង ផ្នែកពាក់ព័ន្ធកំពុងសម្រុករៀបចំកន្លែងប្រារព្ធពិធីបុណ្យសមុទ្រ ដែលធ្វើឡើងនៅទីលានតេជោ (ពយតាមូង) ក្រុងព្រះសីហនុ។ ក្រៅពីកន្លែងប្រារព្ធពិធី ក៏មានការរៀបចំតុបតែងលម្អ នៅតាមផ្លូវ អង្គភាពរដ្ឋ និង ឯកជន ក៏ដូចជានៅតាមទីសាធារណៈទូទាំងក្រុងព្រះសីហនុផងដែរ។

សូមរំឭកផងដែរថា កន្លងមកក្រសួងទេសចរណ៍ បានប្រកាសឱ្យដឹងថា សកម្មភាព និង ព្រឹត្តិការណ៍សំខាន់ៗក្នុងពិធីបុណ្យសមុទ្រឆ្នាំនេះរួមមាន ៣ សំខាន់ៗដូចជា៖

១. ការផ្សាយបន្តផ្ទាល់នូវការសម្ដែងទស្សនីយភាពសិល្បៈ និង មានការបាញ់កាំជ្រួចអបអរពិធីបុណ្យសមុទ្រលើកទី ៩ ឆ្នាំ ២០២២។

២. មហោស្រពម្ហូបអាហារខ្មែរ និង អន្តរជាតិ ព្រមទាំងការបង្ហាញផលិតផលទេសចរណ៍។

៣. សកម្មភាពកីឡាលើទឹក និង កីឡាលើឆ្នេរខ្សាច់៕

រូបភាព ៖ ប្រជាជនខេត្តព្រះសីហនុ