ស្ថិតនៅចម្ងាយប្រមាណជាង ២០០ គីឡូម៉ែត្រពីរាជធានីភ្នំពេញ ខេត្តព្រះសីហនុ ត្រូវបានគេស្គាល់ថា ជាទឹកដីឆ្នេរតារារះ នាទិសនិរតី ដែលកំពុងទទួលបានការចាប់អារម្មណ៍ជាខ្លាំង តាមរយៈទិដ្ឋភាពដងវិថីថ្មីស្រឡាងស្ថាបនាខ្វាត់ខ្វែង ឆ្នេរសមុទ្រធម្មជាតិ និងផ្លូវល្បឿនលឿនដែលចំណាយពេលធ្វើដំណើរលឿនជាងមុន ទាក់ទាញមហាជន ក៏ដូចជាភ្ញៀវទេសចរ ឱ្យចង់ទៅលម្ហែកម្សាន្ត នាថ្ងៃបុណ្យជាតិក៏ដូចជាថ្ងៃឈប់សម្រាកជាដើម។
ទន្ទឹមទៅនឹងចំណុចទាក់ទាញ នៃទឹកដីឆ្នេរតារារះ នាទិសនិរតីនេះ ថ្មីៗនេះ តាមរយៈមន្ទីរទេសចរណ៍ខេត្តព្រះសីហនុ ក៏បានណែនាំនូវកន្លែងកម្សាន្តមួយថ្មីបែបសួនចិញ្ចឹមសត្វ ស្ថិតក្នុងភូមិសាស្ត្រខេត្តព្រះសីហនុ ដែលទីនោះគឺ កសិដ្ឋានចិញ្ចឹមចៀម អូទ្រីស។
កសិដ្ឋានចិញ្ចឹមចៀម អូទ្រីស ជាទីតាំងទេសចរណ៍ថ្មីមួយ ស្ថិតក្នុងស្រុកស្ទឹងហាវ ខេត្តព្រះសីហនុ ដែលកសិដ្ឋាននេះ នៅមិនឆ្ងាយពីទីរួមខេត្ត ប្រមាណ ២២ Km ប៉ុណ្ណោះ។ សម្រាប់បងប្អូនដែលនៅភ្នំពេញក៏មិនពិបាករកដែល ដោយធ្វើដំណើរតាម Express way ត្រង់ផ្លូវចុះស្រុកស្ទឹងហាវ គីឡូម៉ែត្រលេខ 172 បត់ស្តាំ នឹងបានទៅដល់គោលដៅតែម្ដង។
នៅទីតាំងខាងលើ មានបើកទទួលភ្ញៀវទេសចរណ៍ចូលទស្សនាការចិញ្ចឹមចៀម ការចិញ្ចឹមសត្វអូទ្រីសជាច្រើនក្បាល ព្រមទាំងអាចថតរូបភាពកម្សាន្តទៀតផង បង្កើតជាបទពិសោធន៍ដ៏រីករាយថ្មីមួយ នៅពេលដែលអ្នកបានទៅដល់ខេត្តព្រះសីហនុ៕
