ចែកគ្នាដឹង! ក្រសួង មានគោលដៅកំណត់ទូរស័ព្ទនាំចូល ទាល់តែបង់ពន្ធត្រឹមត្រូវ ទើបអាចភ្ជាប់សេវាទូរសព្ទ័បាន
ក្រសួងប្រៃសណីយ៍និងទូរគមនាគមន៍ នៅថ្ងៃទី ០៦ ខែតុលា ឆ្នាំ ២០២២ បានបញ្ជាក់ឱ្យបានដឹងថា ក្រសួងប្រៃសណីយ៍ និងទូរគមនាគមន៍ មានគោលដៅក្នុងការកំណត់ ទូរស័ព្ទដែលនាំចូលទាល់តែបង់ពន្ធត្រឹមត្រូវ ទើបអាចភ្ជាប់បណ្ដាញជាមួយប្រតិបត្តិករទូរស័ព្ទចល័តបាន។
តាមរយៈវីដេអូប្រមាណ ០៥ នាទី បង្ហោះដោយ ក្រសួងប្រៃសណីយ៍និងទូរគមនាគមន៍ រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា លោកបណ្ឌិត គុណ ញឹម បានបញ្ជាក់បែបនេះថា «ក្រសួងប្រៃសណីយ៍ មានគោលដៅមួយក្នុងការកំណត់ថា ទូរសព្ទ័ដែលនាំចូល ទាល់តែបង់ពន្ធអាករត្រឹមត្រូវ ទើបអាចភ្ជាប់បណ្ដាញជាមួយប្រតិបត្តិករទូរស័ព្ទបាន»។
មន្ត្រីជាន់ខ្ពស់ខាងលើ បានបន្តឱ្យដឹងទៀតថា « ក្រសួងប្រៃសណីយ៍ និង ទូរគមនាគមន៍ កំពុងតែធ្វើការជាមួយនឹងប្រតិបត្តិករ ជាការពិតវាត្រូវការពេលវេលា នៅក្នុងការអនុវត្តន៍ពង្រឹងការគ្រប់គ្រងទូរស័ព្ទដែលនាំចូលមក ហើយអាចប្រើប្រាស់បាននេះ ព្រោះទៅមុខទៀត យើងមិនដឹងកាលៈទេសៈពេលណាទេ ប៉ុន្តែក្រសួងប្រៃសណីយ៍មានគោលដៅមួយក្នុងការកំណត់ថា ទូរស័ព្ទដែលនាំចូល ទាល់តែ បង់ពន្ធអាករត្រឹមត្រូវទើបអាចភ្ជាប់បណ្ដាញជាមួយប្រតិបត្តិករទូរស័ព្ទចល័តបាន ដោយយកលេខកូដ IMEI របស់ទូរស័ព្ទនោះ មកធ្វើជាចំណុចក្នុងការ Activate ទូរស័ព្ទ។ ហើយបើសិនទូរស័ព្ទមិនបានបង់ពន្ធអាករទេ អាហ្នឹងយកមកភ្ជាប់ប្រព័ន្ធទូរសព័្ទចល័ត គឺអត់ដើរ»៕
សូមទស្សនាវីដេអូនៅខាងក្រោមនេះ ៖