ផ្អើលអ្នកជិតខាង! កូនៗទាំង ៧ នាក់ នាំគ្នាដឹកដៃម្ដាយ ទៅបញ្ឈប់មង្គលការលើកទី ៥ របស់ឪពុក
រដ្ឋ Uttar Pradesh ជាដែនដីដែលសម្បូរទៅដោយរឿងរ៉ាវចម្លែកៗ។ ជាក់ស្ដែងថ្មីៗនេះ រឿងហេតុដ៏ភ្ញាក់ផ្អើលមួយបានកើតមានឡើងក្នុងរោងការមួយកន្លែង ដែលកូនៗរបស់កូនកំលោះចំនួន ៧ នាក់ ដឹកដៃម្ដាយរបស់ពួកគេ ទៅបញ្ឈប់មង្គលការទី ៥ របស់ឪពុកខ្លួន។
កាលពីថ្ងៃទី ៣០ ខែសីហា ឆ្នាំ ២០២២ កន្លងទៅ ពិធីមង្គលការលើកទី ៥ នៃបុរសវ័យ ៥៥ ឆ្នាំម្នាក់ បានប្រែទៅជាពិធីដ៏វឹកវរមួយ ខណៈកូនៗទាំង ៧ នាក់របស់លោក រួមទាំងម្ដាយៗរបស់ពួកគេ បានចូលទៅអុកឡុកផ្អើលញាតិដែលចូលរួម។
ជម្លោះក្នុងរោងការនេះដែរ កើតមានឡើងក្រោយកូនៗរបស់កូនកំលោះនិយាយប្រាប់គ្រួសារខាងកូនក្រមុំថាពួកគេជានរណា។ ជម្លោះកាន់តែផ្អើលរហូតកូនក្រមុំត្រូវជម្លៀសចេញពីរោង ហើយមនុស្សជាច្រើនបាននាំគ្នាផ្អើលផ្ទុះកំហឹងទៅវាយដំកូនកំលោះ។
តាមការបញ្ជាក់របស់ប៉ូលិសបានឱ្យដឹងថា កូនៗរបស់កូនកំលោះបានទៅប្ដឹងប៉ូលិសពីបញ្ហានេះ។ ក្រោយមកប៉ូលិសបានទៅដល់កន្លែងកើតហេតុ រួមក៏ធ្វើការឃាត់ខ្លួនមនុស្សដែលពាក់ព័ន្ធ។ ក្មេងៗទាំងនោះបានអះអាងថា ឪពុករបស់ពួកគេ គឺឈប់ផ្ដល់ប្រាក់ដែលជាតម្រូវការរបស់ពួកគេរាល់ខែ ដោយក្រោយមកពួកគេក៏រកឃើញថា ឪពុកខ្លួនបានរៀបការជាលើកទី ៥ ទើបសម្រេចចិត្តធ្វើសកម្មភាពបែបនេះទៅ៕
