(វីដេអូ) ចាំខាវ៉ាន់ ដំរីឯកោទេ? ពេលនេះរស់នៅយ៉ាងរីករាយ សោយសុខជាមួយធម្មជាតិ
ដំរីដ៏ឯកាបំផុតនៅលើលោកឈ្មោះ ខាវ៉ាន់ បានធ្វើដំណើរដ៏វែងឆ្ងាយតាមយន្តហោះ ពីប្រទេសប៉ាគីស្ថាន មកដល់ទឹកដីប្រទេសកម្ពុជា នៅព្រលានយន្តហោះអន្តរជាតិក្រុងសៀមរាប កាលពីថ្ងៃទី ៣០ ខែវិច្ឆិកា ឆ្នាំ ២០២០ កន្លងទៅ និងបានធ្វើដំណើរទាំងយប់ ទៅកន្លែងរស់នៅថ្មី នៅលើទឹកដីខេត្តឧត្ដរមានជ័យ។
ក្រោយមកដល់កម្ពុជា ខាវ៉ាន់ បានបន្សាំនឹងបរិស្ថានជុំវិញខ្លួន ដោយមានដំរីញី ០៣ ក្បាល មានឈ្មោះ Dipoh, Arun Reah និង Sarai Mia រស់នៅជាមួយ ដោយខាវ៉ាន់ នឹងត្រូវរស់នៅបន្តនៅក្នុងដែនជម្រកសត្វព្រៃគូលែនព្រហ្មទេព ស្ថិតនៅក្នុងភូមិអូតាម៉េង ឃុំអន្លង់វែង ស្រុកអន្លង់វែង ខេត្តឧត្តរមានជ័យ។
យ៉ាងណាមិញ នៅថ្ងៃទី ០៥ ខែសីហា ឆ្នាំ ២០២២ ថ្មីៗនេះ តាមរយៈគណនី Twitter របស់លោក នេត ភត្រា អ្នកនាំពាក្យក្រសួងបរិស្ថាន បានបង្ហាញពីទិដ្ឋភាពរស់នៅរបស់ខាវ៉ាន់ រស់នៅសោយសុខយ៉ាងរីករាយ ក្នុងតំបន់អភិរក្សធម្មជាតិ លែងជាដំរីឯកោ ដែលរស់នៅក្នុងទ្រុងតូចចង្អៀតដូចមុនទៀតហើយ។
គួរឱ្យដឹងផងដែរថា ខាវ៉ាន់ ដំរីឈ្មោល ដែលមានអាយុ ៣៥ ឆ្នាំ ត្រូវបានចាត់ទុកជាដំរីមួយក្បាលដែលឯកាបំផុតលើពិភពលោក ដោយរូបវាបានចំណាយពេលសឹងមួយជីវិតរបស់ខ្លួន រស់នៅក្នុងទ្រុងដ៏តូចចង្អៀតក្នុងសួនសត្វមួយកន្លែងនៅប្រទេសប៉ាគីស្ថាន ក្រោយដំរីជាដៃគូរបស់វាបានស្លាប់បាត់ទៅ៕
