អុតស្វាកំពុងផ្ទុះឆ្លងពេញអឺរ៉ុប ឥណ្ឌាត្រៀមកន្លែងចត្តាឡីស័ករួចរាល់ ទោះមិនទាន់មានករណីឆ្លង
ខណៈបណ្ដាប្រទេសជាច្រើននៅអឺរ៉ុប កំពុងរងការផ្ទុះឆ្លងខ្លាំងនៃជំងឺអុតស្វា ទីក្រុង Mumbai ប្រទេសឥណ្ឌា ហាក់ត្រៀមរួចរាល់នៅគ្រែចត្តាឡីស័កខ្លួនចំនួន ២៨ គ្រែ នៅឯមន្ទីរពេទ្យ Kasturba ដើម្បីទុកសម្រាប់ដាក់អ្នកដែលសង្ស័យថាកើតជំងឺនេះ។
បើតាមការបញ្ជាក់ពីមន្ត្រីរបស់នាយកដ្ឋានសុខភាពសាធារណៈបានឱ្យដឹងថា មកទល់ពេលនេះ ក្រុង Mumbai មិនទាន់មានករណីសង្ស័យ ឬ ករណីឆ្លងជំងឺអុតស្វានៅឡើយនោះទេ ប៉ុន្តែខាងទីក្រុងគឺបានត្រៀមខ្លួនរួចជាស្រេច រៀបចំគ្រែផ្ដាច់ខ្លួនចំនួន ២៨ គ្រែ ដើម្បីទុកសម្រាប់ដាក់អ្នកដែលមានអាការសង្ស័យ។
គួរបញ្ជាក់ផងដែរថា ជាការណែនាំពីបញ្ហានៃជំងឺរាតត្បាតខ្លាំងមួយប្រភេទនេះ ខាងនាយកដ្ឋានបានឱ្យដឹងថា អាជ្ញាធរនៅព្រលានយន្តហោះ ក៏បានការពារយ៉ាងយកចិត្តទុកដាក់ ធ្វើការស្កេនលើអ្នកដំណើរដែលមកពីបណ្ដាប្រទេសនានា ជាពិសេសប្រទេសដែលកំពុងរងការផ្ទុះឆ្លងវីរុសនេះ ដើម្បីជាការការពារទុកជាមុន៕
