ទុរេនខ្មែរនៅខេត្តណាឆ្ងាញ់ជាងគេ? ខេត្ត ៥ នេះហើយល្បីរន្ទឺមានទុរេនឆ្ងាញ់ដាច់គេ ញ៉ាំហើយផ្តាំកូនផ្តាំចៅទិញញ៉ាំទៀត

ទុរេនគឺជាផ្លែឈើម្យ៉ាងដែលមានសម្បកជាបន្លាស្រួចៗ ហើយសាច់ខាងក្នុងទន់ពណ៌លឿងមានរសជាតិផ្អែមឆ្ងាញ់ពិសា មានក្លិនឈ្ងុយនៅពេលវាទុំ ប៉ុន្តែសម្រាប់អ្នកខ្លះថាវាមានក្លិនស្អុយ ។ បើតាមវចនានុក្រមសម្តេចព្រះសង្ឃរាជ ជួន ណាត ពាក្យថា ទុរេន គឺជាឈ្មោះឈើដំណាំមួយប្រភេទ ផ្លែមានឱជារសផ្អែម សម្រាប់ប្រើជាបង្អែមមានតម្លៃ សម្បកផ្លែមានបន្លារឹង នៅក្នុងកម្ពុជរដ្ឋគេដាំកើតក្នុងតំបន់ខ្លះដោយអន្លើ ។

យ៉ាងណាមិញ ផ្លែឈើប្រភេទនេះត្រូវបានប្រជាជនខ្មែរស្ទើរទូទាំងប្រទេសពេញនិយមទទួលទានណាស់ ឱ្យតែដល់រដូវកាលផ្លែនេះទុំម្តងៗ តែងនាំគ្នាទិញទទួលទាន ទោះវាមានតម្លៃថ្លៃក្តី ហើយផ្លែទុរេនដែលគេពេញនិយមទិញមកទទួលទានខ្លាំងបំផុត គឺបេះចេញពីចម្ការរបស់ប្រជាកសិករខ្មែរ ក្នុងខេត្ត ៥ នៃប្រទេសកម្ពុជា ដោយដំណាំទុរេនក្នុងខេត្តទាំងនោះ ល្បីមានមានរសជាតិឆ្ងាញ់ និង មានក្លិនឈ្ងុយផ្អែមជាប់ចិត្ត ។ យ៉ាងណាមិញ ដើមរដូវផ្លែទុរេននេះ យើងសូមណែនាំ ៥ ខេត្ត ដែលមានដំណាំផ្លែទុរេនឆ្ងាញ់ជាងគេ ៖

១. ទុរេនខេត្តកំពត

ខេត្តកំពតគឺជាខេត្តដែលមានភាពល្បីល្បាញជាងគេ ដែលមានផ្លែទុរេនឆ្ងាញ់ អ្នកណាៗក៏ល្បីដែរទុរេនកំពតៗ ហើយទុរេនលេខមួយប្រចាំតំបន់គឺទុរេនស្រុក​ទឹកឈូ ព្រោះវាមាន​ក្លិនក្រអូប​ឆួល​ខ្លាំង មុត​ជាង​ទុរេន​ដទៃ សម្បុរ​វា​ក៏​ខុសពីទុរេនដទៃ ​រសជាតិវាក៏ឆ្ងុយឆ្ងាញ់ពិសេសលើសគេ ឯតម្លៃវិញថ្លៃជាងទុរេនធម្មតា និង ទុរេនដែលនាំចូលពីបរទេសផងដែរ ។

២. ទុរេនខេត្តបាត់ដំបង

​បើនិយាយពីខេត្តបាត់ដំបងវិញ ទុរេនស្រុក​សំឡូតគឺមាន​រសជាតិ​ឆ្ងាញ់ ​និង មាន​ភាព​ល្បី​ល្បាញ​នៅទូទាំង​ខេត្ត និង ប្រទេស នរណាក៏ដោយឱ្យតែបាន​ទទួលទានហើយនឹងមាន​ការ​ជាប់​ចិត្ត​ ​បើបានទទួលទានម្តងហើយចង់​ទទួលទាន​ម្ដង​ទៀត​ មិន​ចាញ់​ទុរេន​​ខេត្ត​នានា​ប៉ុន្មាន​នោះ​ទេ​ ។ សម្រាប់​ប្រភេទ​ទុរេន​​​ដែល​ពលរដ្ឋ​​​ដាំក្នុងខេត្តនេះ ​មាន​ច្រើនប្រភេទដូចជា ឈុន​លី ​ម៉ានថង់​ ទុរេន​​ដូនតា​ ភូមិ​លី ​ជា​ដើម​ ។​

៣. ទុរេនខេត្តកោះកុង

ងាកទៅកាន់តែខេត្តកោះកុង នាភាគនិរតីវិញ ទុរេនដែលមានភាពល្បីល្បាញខាងរសជាតិឆ្ងាញ់ជាងគេមាននៅស្រុកថ្មបាំង ជាប្រភេទពូជម៉ាន់ថន ប្រសិនបើភ្ញៀវទេសចរណាដែលបានធ្វើដំណើរមកដល់ស្រុកបុទុមសាគរនេះហើយ ពិតជាមិនអាចដកចិត្តចេញពីក្លិនដ៏ឈ្ងុយឈ្ងុបនៃទុរេពូជម៉ាន់ថននេះបានឡើយ ចំណែកឯរសជាតិវិញឆ្ងាញ់គ្មានអ្វីប្រៀប ។

៤. ទុរេនខេត្តត្បូងឃ្មុំ

ខេត្តមួយដែលទើបបែកចេញពីខេត្តកំបពង់ចាមនេះ ក៏មានដំណាំទុរេនល្បីឆ្ងាញ់ដែរ ហើយទុរេនប្រចាំស្រុកតំបែរ គឺល្បីខ្លាំងណាស់ថាមានរសជាតិឆ្ងាញ់ ផ្អែមមុត បើបានភ្លក់ម្តងហើយចង់ភ្លក់ម្តងទៀតព្រោះក្លិនក្រអូបឈ្ងុយឈ្ងប់ ហើយប្រជាកសិករភាគច្រើនបានដាំទុរេន ៣ ប្រភេទ ដូចជា ម៉ានថង វី ៦ និង មូសាំងឃីង ។

៥. ទុរេនខេត្តសៀមរាប

ងាកមកកាន់ទឹកដីដ៏ចំណាស់ និង បុរាណនៃខេត្តសៀមរាបវិញ ក៏មិនខុសពីខេត្តទាំងបួននៅខាងលើនោះដែរ ដោយខេត្តនេះទើបតែមានឈ្មោះបោះសំឡេងរឿងមានដំណាំទុរេនឆ្ងាញ់ ហើយទុរេនល្បីជាងគេក្នុងខេត្តនេះ គឺទុរេនស្រុកបន្ទាយស្រី ជើងភ្នំគូលេន ដែលវាមានឱជារសឈ្ងុយឆ្ងាញ់ពិសា ផ្អែមមុត ក្រអូប មិនចាញ់ទុរេនមកពីតំបន់ដទៃឡើយ ។

សម្រាប់ប្រិយមិត្ត តើក្នុងចំណោមទុរេនយកចេញពី ៥ ខេត្តរបស់ខ្មែរ ចូលចិត្តទទួលទានទុរេនរបស់ខេត្តណាជាងគេ ? បើ Admin វិញ គឺឆ្ងាញ់គ្រប់ខេត្ត ឱ្យតែរបស់ខ្មែរ ៕