បើនិយាយពីស្តេកសាច់គោ អាចនឹងមានអ្នកចូលចិត្តញុំាច្រើនជាងអ្នកចេះចម្អិន ក៏ព្រោះម្ហូបបែបអឺរ៉ុបប្រភេទនេះមានគ្រឿងផ្សំច្រើនប្លែកៗពីគ្នា ។ យ៉ាងណាមិញថ្ងៃនេះ «ប្រជាប្រិយ» នឹងបង្ហាញពីរបៀបធ្វើស្តេកសាច់គោយ៉ាងឆ្ងាញ់ពិសារ និង ងាយស្រួលដល់លោកអ្នកជាមួយនឹងគ្រឿងផ្សំដែលមានលក់នៅលើទីផ្សារស្រាប់ ហើយខាងក្រោមនេះជាវិធីធ្វើស្តេកសាច់គោ (Beef Steak) ៖
-គ្រឿងផ្សំស្តេក ៖ សាច់គោចម្លក ២៥០ ក្រាម, ម្រេចម៉ដ្ឋ ១ ចុងស្លាបព្រាកាហ្វេ, អំបិលម៉ដ្ឋ ១ ចុងស្លាបព្រាកាហ្វេ, ប៊័រ ២០ ក្រាម ។
-គ្រឿងផ្សំបន្លែចំហុយ ៖ មើមការ៉ុត ២០ ក្រាម, សណ្តែកបារាំង ២០ ក្រាម, ត្រសក់ ២០ ក្រាម, ប៊័រ ២០ក្រាម, ផ្កាខាត់ណាពណ៌ស ២០ ក្រាម, អំបិល, ផ្កាខាត់ណាបៃតង (Broccoli) ២០ ក្រាម, ម្រេច ។
-គ្រឿងផ្សំទឹកម្រេចខ្មៅ (ទឹកស្រូប ឬជ្រលក់ស្តេក) ៖ ម្រេចខ្មៅ ៥០ ក្រាម, ខ្ទឹមស ១០ ក្រាម, ខ្ទឹមក្រហម ១០ ក្រាម, ខ្ទឹមបារាំង ១០ ក្រាម, ស្រាក្រហម ២០ ក្រាម, ប៊័រ ១០ ក្រាម, ទឹកជ្រលក់ Demi Glace ៥០ ក្រាម, អំបិល ។
របៀបធ្វើស្តេក ៖ យកសាច់គោចម្លកមកចៀនដោយប្រើប៊័រ រួចរោយម្រេចម៉ដ្ឋ និង អំបិលម៉ដ្ឋពីលើសាច់គោចម្លក ហើយបន្តចៀនសាច់គោចម្លកប្រមាណជា ៨ ទៅ ១៥ នាទីទៅតាមចំណូលចិត្ត ។ ពេលសាច់គោចម្លកឆ្អិនតាមការចង់បានហើយ សឹមដួសដាក់ក្នុងចាន និង រៀបបន្លែចំហុយ និង ស្រោចទឹកម្រេចខ្មៅនៅម្ខាងចាន ដើម្បីលម្អម្ហូប និង ទទួលទានជាមួយ Steak ជាការស្រេច ។
របៀបធ្វើបន្លែចំហុយស្តេក ៖ យកបន្លែទាំងអស់មកហាន់ជាដំៗតូចល្មម លាងទឹក និង តុបតែងឱ្យបានស្អាត រួចយកទៅចំហុយ ដោយដាក់ប៊័រចូលជាជំនួយ ។ ចម្អិនបន្លែទាំងនោះឱ្យឆ្អិនល្មមតាមចំណូលចិត្ត ។ បន្ទាប់មករោយអំបិល និង ម្រេចម៉ដ្ឋពីលើបន្លែដែលចំហុយរួច នោះជាការស្រេច ។
របៀបធ្វើទឹកម្រេចខ្មៅស្តេក ៖ ឆាខ្ទឹមស ខ្ទឹមក្រហម ខ្ទឹមបារាំង ជាមួយប៊័រឱ្យឡើងឈ្ងុយ និង ឡើងពណ៌ រួចដាក់ស្រាក្រហមចូល ហើយរំងាស់ឱ្យដាច់ស្រា ។ បន្ទាប់មកដាក់ទឹកជ្រលក់ Demi Glace អំបិល និង ម្រេចខ្មៅចូល រួចកូរឱ្យសព្វ និង ភ្លក្សមើលតាមចំណូលចិត្ត ។
ប្រភព៖ Daily Food
អត្ថបទដោយ៖ Vathey
