កាលពីដើមខែមករា ឆ្នាំ ២០២៥ កន្លងទៅនេះ គេហទំព័រ Daily Mail បានចុះផ្សាយករណីបុរសម្នាក់រស់នៅរដ្ឋ Queensland ប្រទេសអូស្ត្រាលី បានលាតត្រដាងរឿងរ៉ាវមួយរបស់ខ្លួន បន្ទាប់ពីរូបគេបានប្រទះនឹងសំណាងមួយក្នុងឆាកជីវិត។
បើតាមការចុះផ្សាយបានបង្ហាញថា បុរសរូបនេះមានឈ្មោះ Matt Betteridge គឺជាអ្នកជីករ៉ែត្បូងដ៏មានជំនាញវិជ្ជាជីវៈម្នាក់ ហើយលោកមានមិត្តស្រីម្នាក់ឈ្មោះ Amber និង បានបើកអាជីវកម្មគ្រួសារមួយឈ្មោះ Betteridge Sapphires នៅចំកណ្តាលតំបន់រុករករ៉ែរបស់រដ្ឋ Queensland។
នៅថ្ងៃមួយ ពោលគឺកាលពីខែធ្នូ ឆ្នាំ ២០២៤ កន្លងទៅនេះ រូបលោកបានបង្ហោះវីដេអូឃ្លីបមួយនៅលើ TikTok ចែករំលែកពីបទពិសោធ ដោយរូបលោកបានទៅដើរលេងនៅតំបន់ដាច់ស្រយាលមួយបន្ទាប់ពីមានភ្លៀងធ្លាក់មួយមេយ៉ាងធំ។ ខណៈនោះរូបលោកមានសំណាងមិននឹកស្មានមួយ ព្រោះបានប្រទះឃើញដុំថ្មភ្លឺចាំងចម្លែកមួយដុំផុសចេញពីដី។ ក្រោយរើសវា និង បានយកទៅពិនិត្យមើលយ៉ាងល្អិតល្អន់ ទើបដឹងថាវាជាត្បូងកណ្តៀងដ៏កម្រ មានទម្ងន់រហូតដល់ ៣៩៤ ការ៉ាត់។
លោក Matt Betteridge បាននិយាយថា លោក និង Amber សម្រេចចិត្តមិនកាត់ត្បូងកណ្តៀងនេះ ហើយលក់វាទេ ដោយសារតែវាត្រូវបានគេប៉ាន់ស្មានថាមានតម្លៃត្រឹមតែ ១ ពាន់ដុល្លារប៉ុណ្ណោះ ដូច្នេះលោកមានបំណងរក្សាទុកវាសម្រាប់ខ្លួនឯង។
«យើងនឹងរក្សាស្ថានភាពវាឱ្យនៅដដែល ដែលមានលក្ខណៈជាគ្រីស្តាល់ត្រជាក់ ហើយវានឹងត្រូវបានរក្សាទុកយ៉ាងស្រស់ស្អាតនៅក្នុងស្ថានភាពធម្មជាតិរបស់វា» នេះជាសម្ដីរបស់លោក Matt Betteridge។ គួរឱ្យដឹងដែរថា ចំពោះត្បូងកណ្តៀង គឺជាប្រភេទរ៉ែមួយប្រភេទហៅថា Corundum ដែលជាក្រុមនៃត្បូងរឹងមានពណ៌ផ្សេងៗគ្នា។ មានត្បូងខ្លះពណ៌ខៀវ ឬ Blue Sapphire ត្រូវបានគេហៅថា Sapphire ហើយជាប្រភេទត្បូងដែលមានតម្លៃថ្លៃបំផុតក្នុងលោក៕
