ប្រិយមិត្តបានដឹងរួចមកហើយពីជីវិតពិតតារាសម្តែង សឿន វីតា បន្ទាប់ផុងខ្លួនក្នុងរឿងបណុលដែលលោកមិនខ្លាចនឹងបើកបង្ហាញប្រាប់ដល់មហាជន។ បច្ចុប្បន្ននេះ លោកពិតជាបានខំប្រឹងណាស់ ដោយរកស៊ីផង ធ្វើការផង ដើម្បីរកប្រាក់ចំណូលផ្គត់ផ្គង់ជីវភាព និង ដោះបំណុល តែខណៈលោកនៅមិនទាន់បានស្រាលខ្លួននៅឡើយ ដោយសារសាច់ប្រាក់បំណុលនៅសល់ខ្ទង់ម៉ឺនដុល្លារទៀត។
យ៉ាងណាក៏ដោយ មហាជនក៏បានសរសើរ និង លើកទឹកចិត្តដល់តារាសម្តែង សឿន វីតា ដែលមិនរត់ចោលពីបញ្ហា ហើយថែមទាំងបានខំប្រឹងប្រែងរកចំណូល ដោយការបង្កើតមុខរបរមួយចំនួន ដូចជា លក់ម្ហូបអាហារ ផ្សាយលក់ផលិតផលមួយចំនួន ដើម្បីទទួលបានប្រាក់ចំណូលបន្ថែមចិញ្ចឹមប្រពន្ធកូន និង ដោះបំណុល។
ជាមួយការខិតខំប្រឹងប្រែងមួយរយៈធំកន្លងមកនេះ លោក សឿន វីតា ក៏ធ្លាប់បង្ហើបឱ្យដឹងដែរថា លោកនឹងព្យាយាមរកប្រាក់ចំណូលពីមុខរបរសុចរិត ដើម្បីដោះបំណុលឱ្យទាល់តែអស់។ គួរបញ្ជាក់ដែរថា សម្រាប់បំណុលដែលលោក សឿន វីតា បានជាប់នោះគឺមានប្រមាណជាង ២០ ម៉ឺនដុល្លារ ហើយទំហំទឹកប្រាក់បំណុលដែលរួមរឹតលោក សឿន វីតា នេះ បើតាមគណនី Tiktok របស់លោកដែលបានបង្ហោះកាលពីថ្មីៗគឺបង្ហាញថា លោកបានដោះសងអស់មួយចំនួនធំហើយ ដោយនៅសល់ប្រមាណត្រឹម ១៤ ម៉ឺនដុល្លារប៉ុណ្ណោះ។
ចំពោះចំនួនទឹកប្រាក់ដែលនៅសល់ លោក សឿន វីតា និង ភរិយា ក៏បានដាក់គោលដៅយ៉ាងច្បាស់លាស់ក្នុងឆ្នាំ ២០២៥ នេះថា នឹងខិតខំរកប្រាក់ចំណូលបន្តទៀត ដើម្បីដោះបំណុលដែលនៅសល់ប្រមាណ ១៤ ម៉ឺនដុល្លារនោះឱ្យអស់ ដោយការមិនសុំជំនួយពីបងប្អូនឡើយ ប៉ុន្តែគ្រាន់តែសុំឱ្យបងប្អូនអ្នកគាំទ្រជួយទិញម្ហូបអាហាររបស់លោកដោយក្ដីស្រឡាញ់ប៉ុណ្ណោះ៕
