កាលពីក្នុងអំឡុងឆ្នាំ ២០០០ ជាង បទចម្រៀងល្បីល្បាញ «មិនស្រឡាញ់អូនមិនបាន» ច្រៀងដោយលោក ចាន់ សម័យ និង មានតួសម្តែងក្នុងបទចម្រៀង ដូចជា អ្នកនាង កែវ ពេជ្រពិសី លោក ស៊ុក សុភា លោក យូ ឌីស្កូ លោក សោ ពន្លឺ និង លោក ព្រីង ច័ន្ទបុត្រ ដែលអ្នកគាំទ្រខ្មែរនិយមហៅ F4 នោះ អស់រយៈពេលជាង ២០ ឆ្នាំមកនេះ តារាសម្ដែងទាំង ៥ រូប គឺមានការប្រែប្រួលយ៉ាងច្រើនស្ទើរមិនគួរឱ្យជឿ។
១. អ្នកនាង កែវ ពេជ្រពិសី
អ្នកនាង កែវ ពេជ្រពិសី ត្រូវបានប្រិយមិត្តដឹងថានាងគឺតួ សាន់ ឆាយ។ បច្ចុប្បន្ននេះ កែវ ពេជ្រពិសី មិនទាន់ទៅណាឆ្ងាយពីវិថីសិល្បៈនោះឡើយ ដោយម្តងម្កាលគេឃើញនាងតែងបង្ហាញមុខក្នុងកម្មវិធីនានារបស់មិត្តសិល្បៈ និង ការជួបជុំអ្នកសិល្បៈផ្សេងៗផងដែរ។ ក្រោយពីជួបស្នេហាមិនសមប្រកបម្តងមក ពេលនេះ កែវ ពេជ្រពិសី កំពុងតែរស់នៅយ៉ាងមានសុភមង្គលជាមួយគ្រួសារថ្មី និង ទទួលបានចំណងដៃកូនប្រុសម្នាក់ ហើយនាងក៏កំពុងបើកជំនួញអនឡានក្រោមការគាំទ្រពេញទំហឹងពីស្វាមី ដែលមានទីតាំងនៅម្តុំផ្សារអូរដឹម។ បើនិយាយពីរូមសម្រស់ តារាស្រីរូបនេះនៅតែស្រស់ស្អាត ហើយថ្មីៗនេះនាងបានបង្ហើបថា បើមានឱកាសមកដល់នាងនឹងចូលប្រឡូកសម្តែងកុនឡើងវិញថែមទៀត។
២. លោក យូឌីស្កូ
ចំពោះលោក យូ ឌីស្កូ តួអង្គ តាវ មីងសឺ វិញ បើគិតមកដល់បច្ចុប្បន្ននេះ គេកត់សម្គាល់ឃើញលោកបានប្រែប្រួលរូបរាងយ៉ាងខ្លាំង បន្ទាប់ពីរូបលោកបានធ្លាក់ខ្លួនឈឺដោយសារជំងឺក្រលៀនកាលពីប៉ុន្មានឆ្នាំមុននោះ។ យ៉ាងណាមិញ ក្រោយពេលបានទៅព្យាបាលជំងឺមួយនេះនៅឯប្រទេសឥណ្ឌា និង បានជា ក្រោមជំនួយឧបត្ថម្ភពីសប្បុរសជននោះ លោក យូ ឌីស្កូ ចាប់ផ្តើមមានព្រលឹងព្រលះ សាច់ឈាមស្រស់ថ្លា និង ពេលនេះលោកបានហក់ចូលប្រឡូកក្នុងវិស័យសិល្បៈឡើងវិញផងដែរ។
៣. លោក ស៊ុក សុភា
ងាកមកលោក ស៊ុក សុភា ជាតួអង្គ មីនជូ ឯណេះ បច្ចុន្នប្បន្នកំពុងផ្ញើវាសនាឯនាយទឹកដីប្រទេសអូស្ត្រាលី ជាមួយនឹងការរស់នៅប្រកបដោយសុភមង្គលជាមួយភរិយាជាអាណិកជនខ្មែររស់នៅទីនោះ។ លោក ស៊ុក សុភា បានចេញទៅរស់នៅអូស្ត្រាលីជាច្រើនឆ្នាំមកហើយ ក្នុងនោះលោក និង ភរិយាក៏បានចាប់ដៃគ្នាបើកជំនួញទៀតផង។ បើគិតមកដល់ពេលនេះ លោក ស៊ុក សុភា និង ភរិយា បានទទួលចំណងដៃកូនប្រុសស្រីដល់ទៅ ៥ នាក់ និង ទើបតែប្រកាសពីដំណឹងល្អថែមសមាជិកថ្មីម្នាក់ទៀតផងដែរ។
៤. លោក សោ ពន្លឺ
បើចាប់អារម្មណ៍ពីលោក សោ ពន្លឺ ដែលជាតួអង្គ គួចាលើយ វិញ បច្ចុប្បន្ននេះលោកបាន និង កំពុងសាងជីវិតរស់នៅលើទឹកដីប្រទេសអូស្ត្រាលីយ៉ាងមានសុភមង្គលជាមួយភរិយា និង ទទួលបានចំណងដៃកូនស្រី ៣ នាក់ ដ៏គួរឱ្យស្រឡាញ់ផងដែរ។ បើលើកពីសម្រស់វិញ លោក សោ ពន្លឺ ហាក់មិនចាស់សោះ ដោយលោកនៅតែសង្ហាដូចដើម។
៥. លោក ព្រីង ច័ន្ទបុត្រ
លោក ព្រីង ច័ន្ទបុត្រ គឺសម្តែងជាតួអង្គ ស៊ីមិន។ បច្ចុប្បន្នលោកត្រូវបានគេដឹងថាកំពុងរស់នៅ និង សាងសុភមង្គលជាមួយអ្នកមេម៉ាយម្នាក់ ដែលគេស្គាល់ថាជាម្តាយក្មេករបស់តារាកំប្លែង វ៉ាន់នីឡា។ មុនចុះសំបុត្រអាពាហ៍ពិពាហ៍ជាមួយគូស្នេហ៍ថ្មីនេះ លោក ព្រីង ច័ន្ទបុទ្រ ធ្លាប់បានជួបស្នេហ៍បែកបាក់ម្តងហើយជាមួយគូស្នេហ៍ជាអ្នករស់នៅប្រទេសបារាំង។ យ៉ាងណាក្នុងចំណងស្នេហ៍ថ្មីនេះ គេកត់សម្គាល់ឃើញលោក ព្រីង ច័ន្ទបុត្រ និង ភរិយា ពិតជាមានក្ដីសុខខ្លាំងណាស់ ដោយលោកតែងតែបាននាំភរិយាដើរកម្សាន្តមិនសូវខានឡើយ ដែលស្ទួយឱ្យជីវិតគូលោកមានសុភមង្គលលើសដើម៕
