ថ្មីៗនេះ សារព័ត៌មាន DailyMails បានទម្លាយពីករណីដ៏គួរឱ្យរន្ធត់របស់នារីជនជាតិបេឡារុសម្នាក់ ដែលត្រូវគេល្បួងឱ្យទៅធ្វើជាតារាម៉ូឌែលនៅប្រទេសថៃ ហើយត្រូវគេបោកយកទៅលក់នៅមីយ៉ាន់ម៉ា ចុងក្រោយបានស្លាប់ ដោយគ្រឿងក្នុងត្រូវគេយកទៅលក់អស់។
តាមព័ត៌មានបានឱ្យដឹងថា នារីរងគ្រោះខាងលើនេះ មានឈ្មោះថា Vera Kratsova វ័យ ២៦ ឆ្នាំ ជាជនជាតិបេឡារុស នាងបានធ្វើដំណើរមកកាន់ទីក្រុងបាងកក កាលពីខែកញ្ញា ឆ្នាំ ២០២៥ កន្លងទៅ ហើយក្រោយមកក៏ត្រូវគេបានបោកប្រាស់យកទៅលក់នៅឯជាយដែនមីយ៉ាន់ម៉ា ដោយប៉ាស្ព័រ និងទូរស័ព្ទរបស់នាងត្រូវបានគេដក រួចក៏បញ្ជូននាងទៅឱ្យក្រុមឆបោកអនឡាញ។
ក្រុមឆបោកបានបង្ខំឱ្យនាងធ្វើការជាមួយគេ ដោយឱ្យនាងចុះឈ្មោះក្នុង App រកដៃគូ ដើម្បីឱ្យនាងបោកយកលុយពីប្រុសៗជនជាតិបរទេសដែលមានលុយច្រើន។ នៅពេលដែលនាងធ្វើមិនបានតាមការកំណត់ នាងត្រូវបានគេធ្វើបាប ហើយចាប់តាំងពីថ្ងៃទី ៤ តែតុលា ឆ្នាំ ២០២៥ តមក ក៏លែងមានអ្នកណាទាក់ទងនាងបានទៀត។ ព័ត៌មានបានឱ្យដឹងថា នាងត្រូវបានគេលក់បន្តឱ្យក្រុមជួញដូរអវយវ ដោយនាងត្រូវបានគេធ្វើបាបរហូតដល់ស្លាប់ ទើបយកគ្រឿងក្នុងនាងយកទៅលក់ ចំណែកឯសាកសពត្រូវបានគេដុតចោលដើម្បីបំផ្លាញភស្តុតាង។
លើសពីនេះទៅទៀត ខាងក្រុមឆបោក បានទារលុយពីគ្រួសាររបស់នាងចំនួន ៥ សែនដុល្លារ ដោយកុហកថាជាថ្លៃនាំសពទៅវិញ តែក្រោយមកក្រុមនេះក៏បែរជាបដិសេធ ប៉ុន្តែម្តាយនាងនៅតែអង្វរឱ្យគេប្រគល់ធាតុកូនស្រីឱ្យ ដោយតាំងចិត្តថានឹងទៅទទួលដល់ប្រទេសមីយ៉ាន់ម៉ាទៀតផង៕
ប្រភព៖ DailyMails
