ក្រោយបញ្ចប់កិច្ចប្រជុំក្រុមលេខាធិការ GBC រយៈពេល ៣ ថ្ងៃ ក្រសួងការពារជាតិបញ្ជាក់មានសញ្ញាវិជ្ជមានច្រើន

ក្រោយពី​ការដឹកនាំពីសំណាក់ នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ កាលពីថ្ងៃទី០៤ ខែសីហា ឆ្នាំ ២០២៥ អមដោយគណៈប្រតិភូយោធាជាន់ខ្ពស់ នៃកងយោធពលខេមរភូមិន្ទ ទៅចូលរួមកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC) រយៈពេល ៣ ថ្ងៃមកនោះ ពេលនេះកិច្ចប្រជុំបានបញ្ចប់ជាស្ថាពរហើយ។

ក្នុងកិច្ចប្រជុំនេះ មានតំណាងមកពីប្រទេសម៉ាឡេស៊ី សហរដ្ឋអាមេរិក និងប្រទេសចិន ចូលរួមសង្កេតការណ៍ក្នុងប្រជុំវិសាមញ្ញគណៈកម្មាធិការព្រំដែនទូទៅ (GBC) ដែលប្រព្រឹត្តទៅនៅទីក្រុង កូឡាឡាំពួរ ប្រទេសម៉ាឡេស៊ី។

ដោយឡែក នៅព្រឹកថ្ងៃទី ០៧ ខែសីហា ឆ្នាំ ២០២៥ នេះ លោកជំទាវឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ បានឱ្យដឹងថា កិច្ចប្រជុំក្រុមលេខាធិការព្រំដែនទូទៅកម្ពុជា-ថៃ (GBC) រយៈពេល ៣ ថ្ងៃ មកនេះ មានសញ្ញាវិជ្ជមានជាច្រើនរវាងភាគីទាំងពីរ។

ក្នុងនោះ អ្នកនាំពាក្យក្រសួងការពារជាតិ បានឱ្យដឹងថា៖ «កិច្ចប្រជុំ ៣ ថ្ងៃនេះ ក្រុមការងារលេខាធិការដ្ឋានកិច្ចការព្រំដែនទូទៅកម្ពុជា-ថៃ (GBC) បានផ្លាស់ប្តូរនៃចំណុចសំខាន់ៗជាច្រើនប្រកបដោយភាពវិជ្ជមាន ធាតុចូលជាច្រើនរបស់កម្ពុជា ក៏បានភាគីថៃយល់ស្រប និងទទួលយក ដោយឡែកភាគីថៃក៏មានចំណុចល្អខ្លះដែលកម្ពុជា ទទួលយកដូចគ្នា»។

គួរបញ្ជាក់ផងដែរថា កិច្ចប្រជុំក្រុមលេខា GBC បានចាប់ផ្តើមពីថ្ងៃទី ៤ ដល់ទី ៦ ខែសីហា ឆ្នាំ ២០២៥ និង កិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC) ប្រព្រឹត្តទៅ នៅថ្ងៃទី ៧ ខែសីហា ឆ្នាំ ២០២៥៕