មហាជននិយមតាមដានសកម្មភាពសង្គមរបស់លោក Rick KH ឬ គោប្រាក់ ច្បាស់ជាបានដឹងមកហើយ ពីទឹកចិត្តធំធេងរបស់លោកកន្លងមក ដែលបានរៀបចំស្បៀងអាហារ ថវិកា ដោយជាប្រាក់ផ្ទាល់ខ្លួន និង ទទួលបានពីសប្បុរសធម៌ ជួយដល់កងទ័ពជួរមុខ និង ជនភៀសសឹកជាដើមនោះ។
ដោយឡែក ថ្មីៗនេះ លោក Rick KH ក៏ទើបតែសម្ពោធលក់ជាផ្លូវការនូវផលិតផលស្នាដៃកូនខ្មែរ ថ្នាំដុសធ្មេញអបិលហិមាល័យ ដែលជាការខិតខំប្រឹងប្រែងស្រាវជ្រាវអស់រយៈពេលជាង ១ ឆ្នាំ ជាមួយនឹងមិត្តភក្តិជាកូនខ្មែរកម្ពុជា និង ទទួលបានការគាំទ្ររហូតជើងដំបូងនេះដាច់ស្តុកភ្លាមៗ។
យ៉ាងណាមិញ ក្រោយលក់ផលិតផលជាស្នាដៃកូនខ្មែរពិតៗនូវស្តុកដំបូងអស់ភ្លាមៗ លោក Rick KH ក៏បានយកប្រាក់ពីការលក់នោះទៅទិញស្បៀងបន្តទៀតជូនដល់ក្រុមគ្រួសារកងទ័ព ដោយលោកបានបង្ហោះឱ្យដឹងថា៖ «ទឹកប្រាក់នេះបានពីខាងថ្នាំដុសធ្មេញអំបិលហិមាល័យ។ ប្អូនៗ ដែលមានឪពុកជាទាហាន ថ្ងៃអាទិត្យនេះពេលមកអាន អាចបើកយកស្បៀងនៅខាងក្រោយនេះបាន សូមបំពេញឈ្មោះគ្រួសារឱ្យបានត្រឹមត្រូវ បើមកក្រោយគេអស់ខ្ញុំជូនជាទឹកប្រាក់ ២ មុឺនរៀល (តាមលទ្ធភាពដែលខ្ញុំមាន) (បញ្ជាក់កូនទាហានជួរមុខ)»៕
