មហាជនអ្នកប្រើប្រាស់បណ្ដាញសង្គម បាននាំគ្នាផ្ទុះការភ្ញាក់ផ្អើលបន្ទាប់ពីបានទស្សនាវីដេអូ រថយន្តដែលកំពុងបើកបរលើផ្លូវល្បឿនលឿន ជួបប្រទះករណីរថយន្តមួយគ្រឿងទៀតនៅទទឹងផ្លូវល្បឿនលឿន ទាំងកណ្ដាលយប់ បង្កនូវហានិភ័យខ្ពស់ដល់អ្នកធ្វើដំណើរ។
ទាក់ទិនទៅនឹងករណីនឹកស្មានមិនដល់នេះ ត្រូវបានបង្ហោះដោយគណនីដែលមានឈ្មោះ Kresna Phally បានបញ្ជាក់នៅថ្ងៃទី ១០ ខែសីហា ឆ្នាំ ២០២៥ ឱ្យបានដឹងថា នៅវេលាម៉ោង ១០:១៨ នាទី យប់ថ្ងៃទី ១០ ខែសីហា ឆ្នាំ ២០២៥ លោកបានគេចផុតឡានមួយគ្រឿងទាំងព្រលឹងចុងសក់ ដោយសារតែរថយន្តភីកអាប់ពណ៌សមួយគ្រឿងនោះនៅទទឹងផ្លូវ ត្រង់គីឡូ ៨១ នៅលើផ្លូវល្បឿនលឿន ពីភ្នំពេញទៅខេត្តព្រះសីហនុ។
តាមប្រភពបានបន្តថា បើតាមការឱ្យដឹងពីក្រុមហ៊ុនផ្លូវល្បឿនលឿន នៅពេលលោកទាក់ទងសួរពីរឿងនេះ ខាងក្រុមការងារបានប្រាប់ថា រថយន្តនេះត្រូវបានកម្លាំងភ្នាក់ងារក្រុមហ៊ុនឃាត់បានហើយ នៅពេលរថយន្តនេះចូលចំណត និង បានហៅនគរបាលឱ្យមកយករថយន្តនេះទៅពិន័យ និង ចាត់ការតាមច្បាប់។ អ្នកបើកបររូបនេះ ប្រហែលមិនបានដឹងពីច្បាប់ចរាចរណ៍ផ្លូវល្បឿនលឿន បានជាបើកត្រលប់ថយក្រោយ ជិះបញ្ច្រាសនៅលើផ្លូវតែម្ខាងដល់ទៅពីរដង ដោយមិនបានឆ្លងទៅផ្លូវម្ខាងទៀត ដើម្បីជិះត្រលប់ថយក្រោយទេ៕
