មានករណីបង្រ្កាបចោរនៅប្រទេសប្រេស៊ីលមួយកំពុងធ្វើឱ្យមហាជនចាប់អារម្មណ៍ ព្រោះតែប៉ូលិសនាំគ្នាស្លៀកឈុត Power Ranger ទាំងក្រុមចុះទៅប្រតិបត្តិការចាប់ជនល្មើស។
តាមព័ត៌មានបានឱ្យដឹងថា នៅប្រទេសប្រេស៊ីលកំពុងតែមានពិធីបុណ្យ Carnival ដ៏ធំប្រចាំឆ្នាំ ហើយក្នុងនោះមានជនឆ្លៀតឱកាសជាច្រើនបានចូលទៅលួចសម្ភារៈរបស់ប្រជាជនដែលទៅចូលរួមលេងសប្បាយ ដែលនៅក្នុងនោះមានទូរស័ព្ទជាង ៩០០ គ្រឿងឯណោះដែលបានបាត់។ ដោយសារតែហេតុនេះហើយ ទើបខាងអាជ្ញាធរបានចាត់ឱ្យក្រុមប៉ូលិសស្លៀកឈុត Power Ranger នឹងចុះទៅចាប់ខ្លួនពួកចោរឆ្លៀតឱកាស ដើម្បីរក្សាសុវត្ថិភាព និង សន្តិសុខជូនដល់ប្រជាជន។
យ៉ាងណាមិញ ខាងប៉ូលិសក្នុងឈុត Power Ranger បានចាប់ចោរមួយរូបបានសម្រេច ដោយដកហូតបានទូរស័ព្ទចំនួន ៧ គ្រឿង និង លុយប្រមាណជាង ២ ពាន់ដុល្លារ ហើយក៏បញ្ជូនខ្លួនទៅកាត់ទោសតាមច្បាប់។ ដោយឡែក មហាជនពិតជាសរសើរនូវថ្វីដៃ និង ការខិតខំរបស់ក្រុមប៉ូលិសខាងលើនេះមិនតិចឡើយ ជាពិសេសគឺការស្លៀកឈុត Power Ranger នេះតែម្តង៕
ប្រភព៖ Sanook
