ពិតណាស់ កន្លងមកយើងធ្លាប់តែបានឮនូវបទ «សំពោងផ្កាចារ» នៅក្នុងពិធីមង្គលសិរីសួស្ដីអាពាហ៌ពិពាហ៌ ដែលបង្ហាញនូវអត្ថន័យផ្កាប្រភេទនេះ ដែលបង្ហើរតែក្លិនតែពុំដឹងថាដើមនៅឯណានោះឡើយ ព្រោះថាក្មេងៗជំនាន់ក្រោយមួយចំនួនក៏ពុំបានស្គាល់រូបរាង ក៏ដូចជាសម្រស់របស់វា ថាតើមានភាពស្រស់ស្អាតទាក់ទាញកម្រិតណានោះ។
យ៉ាងណាមិញ ថ្មីៗនេះ តាមរយៈផេក Battambang Vibe បានបង្ហាញរូបភាពជាច្រើនសន្លឹកអំពីផ្កាចារនេះ ដែលកំពុងតែរីកស្គុសស្គាយត្រសុំត្រសាយ បង្អួតសម្រស់នៅមាត់ផ្លូវមួយកន្លែងស្ថិតក្នុងភូមិសាស្ត្រខេត្តបាត់ដំបង ធ្វើឱ្យអ្នកបានឃើញមានអារម្មណ៍រំភើប ដោយសារវាមានពណ៌ដិតស្អាតត្រជាក់ផ្នែកគួរឱ្យទាក់ទាញ និង កម្របានឃើញផងដែរ។
ដោយឡែកបើយោងតាមប្រភព យសោធរ ចងក្រងដោយសាស្ត្រាចារ្យ អាំង ជូលាន បានឱ្យដឹងថា បច្ចុប្បន្ន ដើមចារ ពុំសូវឃើញមាននៅតាមទីក្រុងនោះឡើយ ហើយបើនៅតាមជនបទវិញគឺគេឃើញមានម្តងម្កាលប៉ុណ្ណោះ។ នៅរដូវប្រាំងហើយក្តៅ ដើមផ្កាប្រភេទនេះ ច្រើនលូតចេញផ្កាស្គុសស្គាយ ថែមទាំងជ្រុះនៅតាមគល់វាផង រីឯពណ៌វិញ គឺនៅចន្លោះស្លាទុំ និង ក្រហម មើលទៅគួរជាទីត្រកាលពន់ពេក៕
រូបភាព ៖ Battambang Vibe
