ជាការពិតណាស់ ក្រោយពីមានការចល័តកម្លាំង និង អាវុធទៅព្រំដែន ដើម្បីការអនុវត្តផែនការបម្រុង ក្នុងការការពារបូរណភាពទឹកដីកម្ពុជា ក្រោយពីមានការប៉ះទង្គិចគ្នារវាងកងទ័ពកម្ពុជា និង កងទ័ពថៃ ដែលបានកើតឡើងនៅព្រឹកថ្ងៃទី ២៨ ខែឧសភា ឆ្នាំ ២០២៥ នៅភូមិតេជោមរកត ឃុំមរកត ស្រុកជាំក្សាន្ត ខេត្តព្រះវិហារ កាលពីពេលកន្លងទៅនោះ គេឃើញប្រជាជនកម្ពុជាកាន់តែយកចិត្តទុកដាក់យ៉ាងខ្លាំង ជាពិសេសគឺការដឹងពីសុខទុក្ខរបស់កងទ័ពឈរជើងនៅតាមតំបន់នានា។ លើសពីនោះ គេបានឃើញមានយុវជនជាច្រើន បានប្រកាសស្ម័គ្រចិត្តចូលជួរកងទ័ព បើសិនជាប្រទេសជាតិត្រូវការថែមទៀត។
ក្រឡេកទៅមើល «តួត្លុក» ជំនាន់ថ្មី លោក រិទ្ធ ដារ៉ូ ក៏បានបង្ហាញឆន្ទៈក្នុងនាមជាប្រជាពលរដ្ឋខ្មែរដូចគ្នា ដោយលោកលើកឡើងថា បើប្រទេសជាតិត្រូវការលោក លោកនឹងចូលរួមបើទោះជាលោកមិនចេះលីគ្រាប់ បាញ់បោះក្តី តែក៏បានទៅជួយការងារផ្សេងៗផងដែរ។
ក្នុងនោះ លោក រិទ្ធ ដារ៉ូ ហៅ ព្រះនាងតូច បានរៀបរាប់ថា ៖ «កើតមកមួយជាតិនេះមានឈាមជាខ្មែរ ខ្ញុំសំណាងពេកហើយ! ចង់ប្រាប់ថា បើសិនជាប្រទេសជាតិមួយនេះ ត្រូវការខ្ញុំឱ្យទៅសមរភូមិ ខ្ញុំសូមឆ្លើយថាយល់ព្រមដោយមិនរួញរា ខ្ញុំមិនចេះលីគ្រាប់ ខ្ញុំមិនចេះបាញ់បោះ យ៉ាងហោចណាស់ក៏ខ្ញុំអាចទៅដាំបាយ រែកទឹកជូនបងៗកងកម្លាំងបានដែរ ស្មារតីតែមួយ។ សូមឱ្យទេវតា វត្ថុស័ក្តិសិទ្ធិ តាមជួយថែរក្សាបងៗកងទ័ព ដែលឈរការពារតាមខ្សែបន្ទាត់ព្រំដែនផង។ សូមឱ្យមានស្មារតីរឹងមាំ សុខភាពល្អ»៕
