ពេលនេះ នៅលើបណ្ដាញសង្គមមហាជនអ្នកគាំទ្រវិស័យបវរកញ្ញាជាច្រើនបន្តចែករំលែក និង វែកញែកខ្លាំងជុំវិញរឿងវីដេអូ Talent ដែលបវរកញ្ញា ឈុំ ចាន់ដារ៉ា បានលើកយករបាំគ្រុឌ ដើម្បីត្រៀមសម្ដែងបង្ហាញក្នុងវគ្គ Talent Show លើឆាកអន្តរជាតិ ប៉ុន្តែត្រូវប្ដូរវិញ ដោយសារមិនបានសុំការអនុញ្ញាតសិទ្ធិពីម្ចាស់ដើម ទើបខាងម្ចាស់របាំនេះមិនបានអនុញ្ញាតឱ្យយកទៅបង្ហាញ។
ជុំវិញការវែកញែកខាងលើនេះដែរ ឃើញថាទាំងខាងស្ថាប័នបវរកញ្ញា MSC និង ខាងម្ចាស់សិទ្ធិរបាំគ្រុឌ កំពុងត្រូវបានមហាជន បញ្ចេញមតិវែកញែក និង រិះគន់រកខុសត្រូវរៀងៗខ្លួន ខណៈពុំទាន់មានការចេញបកស្រាយច្បាស់ពីរឿងរ៉ាវយ៉ាងណាឡើយពីភាគីទាំងសងខាង។
ស្របពេលកំពុងផ្ទុះវែកញែក និង មានមតិរិះគន់ច្រើនលើម្ចាស់សិទ្ធិរបាំនេះ ក៏បានឃើញហ្វេសប៊ុកផេក CBeauty Pageant បានបង្ហោះពីការបកស្រាយរបស់ម្ចាស់សិទ្ធិរបាំដែលមានឈ្មោះថា អ្នកគ្រូ ហ៊ុន ប៉ែន ជុំវិញរឿងរ៉ាវខាងលើ ដោយលើកឡើងជាច្រើនចំណុច និង មូលហេតុច្បាស់ៗដែលអ្នកគ្រូមិនអនុញ្ញាតឱ្យខាងស្ថាប័ន និង បវរកញ្ញា MSC 2025 យករបាំនេះទៅបង្ហាញលើឆាកអន្តរជាតិ។
បន្ទាប់ពីឃើញការបកស្រាយរបស់អ្នកគ្រូដែលជាម្ចាស់សិទ្ធិរបាំនេះ ក៏បានឃើញមហាជនជាច្រើនបញ្ចេញមតិយល់ស្រប និង គាំទ្រពេញចិត្តការលើកឡើងរបស់អ្នកគ្រូ ប៉ុន្តែក្នុងនោះក៏ចាប់អារម្មណ៍ឃើញមានមតិមួយទំនងជាក្រុមការងារខាងបវរកញ្ញា MSC បានចូលរួមឆ្លើយតបទៅអ្នកគ្រូវិញថា ៖ «អ្នកគ្រូនិយាយមិនទាន់អស់ទេ អ្នកគ្រូធ្វើឱ្យគេយល់ច្រឡំពួកខ្ញុំហើយ ពួកខ្ញុំបានឆាតទៅសុំ និងជួយបង្ហាត់តាំងពីមួយខែកន្លះមកម្ល៉េះ អ្នកគ្រូថាចាំទម្លាក់លេខ ទំនាក់ទំនង តែអ្នកគ្រូទុកឆាតពួកខ្ញុំចោល នៅមានច្រើនទៀត ប្រហែលជាបើមិនចេញវីដេអូទេ គ្រប់គ្នាគិតថាពួកខ្ញុំមិនសួរនាំម្ចាស់ដើមទេ!», «ពួកខ្ញុំព្យាយាម អង្វរ និងសុំលេខ សុំជួបច្រើនដងណាស់មុនមានបញ្ហា តែអ្នកគ្រូថារវល់នេះ នោះរហូត ដល់ចេញវីដេអូទើបអ្នកគ្រូរករឿង», «ហើយពួកខ្ញុំក៏បានសុំទោស និងធ្វើតាមគាត់ហើយដែរនូវវីដេអូ talent បានដូរចេញរួចរាល់ហើយ។ តែជារឿងស៊យមានជាប់បន្តិចក្នុង introduction ហើយខ្ញុំក៏ធ្លាប់ប្រាប់ដែរថា ធ្លាប់មានបែកតិចតួច ក្នុងពេលកំពុងចរចា។ តែ video introduction នោះ international ផុសហើយ យើងលុបអត់កើតទេ សុំអ្នកគ្រូអនុគ្រោះ តែគាត់មិនយោគយល់ ទោះឱ្យហេតុផលយ៉ាងណាក៏ដោយ ហេតុអីបានជាពួកខ្ញុំត្រូវខុសទាំងស្រុង? រឿងខុសពួកខ្ញុំទទួលហើយម្ដងហើយ រួចក៏ធ្វើតាមហើយដែរ មិនបានយក talent ទៅបង្ហាញទេ សូម្បីវីដេអូថតហើយ»៕
