ប្រទេសអ៊ីតាលីបានបង្ហាញបន្ទប់រួមភេទដំបូងសម្រាប់អ្នកទោសជាប់គុក បន្ទាប់ពីមានសេចក្តីសម្រេចរបស់តុលាការ ដែលបាននិយាយថា អ្នកជាប់គុកមានសិទ្ធិក្នុងការជួបជុំស្និទ្ធស្នាលជាមួយអ្នកមកសួរសុខទុក្ខបាន។
កន្លែងទទួលទានអាហារ ត្រូវបានជ្រើសរើសរៀបចំធ្វើជាបន្ទប់រួមភេទកាលពីថ្ងៃសុក្រ សប្តាហ៍មុន នៅក្នុងពន្ធនាគារមួយនៃទីក្រុង Terni ស្ថិតក្នុងតំបន់ Umbria ប្រទេសអ៊ីតាលី។ បន្ទប់នេះអនុញ្ញាតឱ្យដៃគូជាមនុស្សស្រី ដែលមកសួរសុខទុក្ខអាចចូលទៅរួមភេទជាមួយគ្នាបាន។ ការពិសោធបែបស្រើបស្រាលនេះ ទទួលបានជោគជ័យខ្លាំង ដែលបច្ចុប្បន្នខាងពន្ធនាគារកំពុងរៀបចំផែនការណាត់ជួបបន្ថែមទៀតសម្រាប់អ្នកទោស។
លោក Giuseppe Caforio អ្នកឃ្លាំមើលសិទ្ធិអ្នកទោសនៃតំបន់ Umbria បានប្រាប់ទីភ្នាក់ងារសារព័ត៌មាន ANSA ថា៖ «ការពិសោធមួយប្រភេទនេះ បានដំណើរការយ៉ាងល្អ ហើយនៅប៉ុន្មានថ្ងៃខាងមុខ យើងនឹងដាក់ឱ្យមានការណាត់ជួបរួមភេទបន្ថែមទៀត។ យើងពិតជាសប្បាយចិត្ត ព្រោះអ្វីគ្រប់យ៉ាងបានប្រព្រឹត្តទៅដោយរលូន ប៉ុន្តែវាចាំបាច់ក្នុងការរក្សាភាពឯកជនជាអតិបរមា ដើម្បីការពារអ្នកពាក់ព័ន្ធផងដែរ»។
បើយោងតាមសាលក្រម កាលពីខែមករា ឆ្នាំ ២០២៤ របស់តុលាការបានចែងថា អ្នកទោសពន្ធនាគារ គួរតែមានសិទ្ធិក្នុងការណាត់ជួបជិតស្និទ្ធជាមួយប្តី ឬប្រពន្ធ ឬដៃគូរយៈពេលវែង ដោយគ្មានអ្នកយាមគុកតាមឃ្លាំមើល។ អ្នកទាំងពីរត្រូវតែមានសិទ្ធិចូលទៅកាន់បន្ទប់ដែលមិនជាប់សោ ដោយមានគ្រែ និង បង្គន់មួយ សម្រាប់រយៈពេលរួមភេទរហូតដល់ពីរម៉ោង។
កន្លងមក ប្រទេសនៅអឺរ៉ុបភាគច្រើនដូចជា បារាំង អាល្លឺម៉ង់ អេស្ប៉ាញ ហូឡង់ និង ស៊ុយអែត បានអនុវត្តរួចមកហើយ។ កាលពីឆ្នាំមុន សភាអ៊ីតាលីបានអនុម័តច្បាប់មួយ ដើម្បីកែលម្អលក្ខខណ្ឌក្នុងពន្ធនាគារ ខណៈដែលពួកគេសម្គាល់ឃើញអ្នកទោសជាប់គុក បានធ្វើអត្តឃាតកាន់តែច្រើន៕
ប្រភព៖ NYP
