បើគិតមកដល់ពេលនេះ រយៈពេលប្រមាណជាជិត ១០ ឆ្នាំ មកហើយ ដែលជំទាវ ចន ច័ន្ទលក្ខិណា និង អតីតស្វាមី គឺលោក យុត្ថារ៉ា ឆានី បានលែងលះគ្នា ដោយសល់នៅចំណងអាពាហ៍ពិពាហ៍កូនស្រីមួយរូប។
ក្នុងនោះ បើទោះជាចែកផ្លូវគ្នាដើរ និង មានគ្រួសារថ្មីរៀងៗខ្លួនហើយនោះ ជំទាវ ចន ច័ន្ទលក្ខិណា និង លោក យុត្ថារ៉ា ឆានី នៅតែមានទំនាក់ទំនងល្អនឹងគ្នាទាំងក្នុងការងារ ព្រមទាំងបំពេញតួនាទីជាឪពុកម្តាយដល់កូនស្រីបណ្តូលចិត្តទៀតផង។
ជាក់ស្ដែង ថ្មីៗនេះ អ្នកលេងបណ្តាញសង្គមហ្វេសប៊ុក កំពុងផ្ទុះការចាប់អារម្មណ៍ និង ចែករំលែករូបភាពប៉ុន្មានសន្លឹករបស់ជំទាវ ចន ច័ន្ទលក្ខិណា និង អតីតស្វាមី ព្រមទាំងកូនស្រី បានថតរួមគ្នាក្នុងថ្ងៃកំណើតកូនស្រីគម្រប់ ១៨ ឆ្នាំ។
រូបភាពទាំងនោះ បានធ្វើឱ្យអ្នកគាំទ្រសរសើរទឹកចិត្តជាឪពុកម្តាយ បើទោះជាចែកផ្លូវគ្នា លែងមានឈ្មោះជាគ្រួសារតែមួយក្តី ប៉ុន្តែជំទាវ ចន ច័ន្ទលក្ខិណា និង លោក យុត្ថារ៉ា ឆានី បានបំពេញសុភមង្គលដល់កូនស្រី ថតរូបជុំអតីតគ្រួសារជាថ្មី និង ថើបកូនស្រីពោរពេញដោយក្តីសុខ៕
