ក្រោយការបញ្ចប់វគ្គផ្តាច់ព្រ័ត្រនៃការប្រកួតកម្មវិធី Miss Supranational Cambodia 2025 ហើយនោះ មហាជនអ្នកលេងបណ្តាញសង្គហ្វេសប៊ុក ច្បាស់ជាបានឃើញមកហើយ នូវការបញ្ចេញមតិប្រតិកម្មមិនទទួលយកលទ្ធផលក្នុងការប្រកួត របស់ អេនណា រ៉ូស ដែលជាបេក្ខភាពមួយរូបនៃការប្រកួតសម្រស់ខាងលើ។
ជាការពិត ចាប់តាំងពីអំឡុងពេលប្រកួត រហូតដល់វគ្គប្រកួតផ្ដាច់ព្រ័ត្រនៅយប់ថ្ងៃទី ២ ខែមេសា ឆ្នាំ ២០២៥ កន្លងមកនេះ អេនណា រ៉ូស ហាក់ជឿជាក់លើសមត្ថភាពខ្លួនឯងខ្លាំងណាស់ទៅលើគោលដៅយកមកុដឱ្យបាន ប៉ុន្ដែជាលទ្ធផល នាងមិនត្រឹមតែខកចិត្តមិនបានទទួលជ័យលាភីនោះទេ សូម្បីតែតំណែង Top ណាមួយ ក៏ រ៉ូស មិនបានទទួលដែរ ហើយលទ្ធផលនេះបានធ្វើឱ្យនាងហាក់មិនពេញចិត្តជាខ្លាំង។
ក្នុងនោះ អេនណា រ៉ូស បានធ្វើឱ្យមហាជនអ្នកលេងបណ្ដាញសង្គមបន្តវែកញែកខ្លាំង ដោយក្នុងនោះមានទាំងបវរកញ្ញារៀមច្បង និង សិល្បករមួយចំនួននាំគ្នាបញ្ចេញមតិទៅលើការប្រតិកម្មរបស់នាងជាបន្តបន្ទាប់ ដោយមានទាំងការបង្ហោះសារ និង វីដេអូផងដែរ។
ដោយឡែក កាលពីរាត្រីថ្ងៃទី ០៣ ខែមេសា ឆ្នាំ ២០២៥ កន្លងទៅនេះ អេនណា រ៉ូស បានបង្ហោះសារមួយទៀតមិនសំចៃនោះឡើយ ដោយនាងបង្ហោះសារ ចង់សំដៅកម្មវិធីយកនាងមកលេងសើច ដោយរយៈពេល ៤ ខែ មកនេះ នាងខាតបង់ទាំងលុយកាក់ ពេលវេលា និង ការងារ។
សារនោះ អេនណា រ៉ូស បានរៀបរាប់ថា៖ «៤ ខែ កន្លងមកនេះ ខាតបង់លុយកាក់ ពេលវេលាច្រើនណាស់ ទាំងការងារក៏បាត់បង់ អ្នកណាមិនឈឺលេងចឹងចឹង! កម្មពៀរមានពិត មិនចាំជាតិក្រោយ យកខ្ញុំមកលេងសើច ដើម្បីផលប្រយោជន៍ខ្លួនឯង។ ខ្ញុំមិនសងសឹក តែចាំទទួលផលកម្មតាមនឹងចុះ»៕
