ចប់ការប្រកួត ២ ថ្ងៃ Coach ខ្មែរមួយជីវិត បង្ហាញអារម្មណ៍យ៉ាងមោទកភាពចំពោះ G-ONE
ក្រោយប្រកួតយ៉ាងស្វិតស្វាញជម្រុះអស់បេក្ខជន បេក្ខនារីជាច្រើនរូប អស់រយៈពេលជាច្រើនខែកន្លងមក កម្មវិធីប្រកួតចម្រៀងរ៉េប «The Rapper Cambodia» បានបញ្ចប់ដោយជោគជ័យហើយ កាលពីរាត្រីថ្ងៃទី ២៤ ខែធ្នូ ឆ្នាំ ២០២៣ កន្លងទៅ ដោយម្ចាស់ជ័យលាភី បានទៅលើកំលោះសង្ហា YuuHai ដែលជាកូនក្រុមរបស់គ្រូបង្វឹកដ៏ឆ្នើម លោក Norith។
ជាមួយគ្នានោះ បន្ទាប់ពីកម្មវិធីប្រកួតស្វែងរក Rapper ក្នុងប្រទេសមួយនេះបានបញ្ចប់សព្វគ្រប់ហើយនោះ នៅថ្ងៃទី ២៦ ខែធ្នូ ឆ្នាំ ២០២៣ ពោលគឺក្រោយ ២ ថ្ងៃនៃការប្រកួតវគ្គផ្តាច់ព្រ័ត្រ ក្រឡេកទៅមើល Coach ខ្មែរមួយជីវិត ក៏បានបង្ហោះសារ បង្ហាញពីអារម្មណ៍ និង មោទកភាពយ៉ាងខ្លាំងដល់កូនក្រុមរបស់ខ្លួន គឺបេក្ខជន G-One ផងដែរ។
ក្នុងនោះ Coach ខ្មែរមួយជីវិត បានរៀបរាប់ថា៖ «ទោះបី ជីវ័ន្ត និង បេក្ខជនដទៃទៀតមិនបានលើកពានមែន តែវានៅតែជាជោគជ័យ និង បទពិសោធដ៏ល្អមួយ នៅលើឆាកដ៍អស្ចារ្យនៃកាប្រគំតន្រ្តីហ៊ីបហ៊ប ក្នុងប្រទេសកម្ពុជាយើង។ HipHop to the Fullest»៕
