គេថាបើចង់ដឹងស្រលាញ់គ្នាពិតឬមិនពិត គប្បីចំណាយពេលស្វែងយល់ចិត្តគ្នាជាមុនសិន។ តែបើតាមអ្នកជំនាញខាងអ័រម៉ូនមនុស្ស អ្នកមិនចាំបាច់ខាតពេលវេលាយូរ ដោយគ្រាន់តែសម្គាល់តាមរយៈអារម្មណ៍ផ្សេងៗ ដែលបញ្ចេញដោយអ័រម៉ូនរាងកាយ។
ជាក់ស្តែង យោងតាមអ្នកជំនាញសុខភាពអ័រម៉ូននៅគ្លីនិក Balance My Hormones នៅចក្រភពអង់គ្លេស បើអ្នកតែងតែមានអារម្មណ៍ហត់នឿយ ឬរស់នៅក្នុងស្ថានភាពថប់បារម្ភ ជាពិសេស មានអារម្មណ៍បែបនេះពេលកំពុងនៅជាមួយគូស្នេហ៍ ឬសង្សារ វាគឺជាសញ្ញានៃការកើនឡើងអ័រម៉ូនស្ត្រេសម្យ៉ាងហៅថា cortisol។
អ្នកជំនាញខាងលើ បានបញ្ជាក់ថា អ័រម៉ូនស្ត្រេស cortisol វានឹងកើនឡើងនៅពេលដែលអ្នកស្ថិតក្រោមសម្ពាធផ្លូវចិត្ត ឬផ្លូវកាយ ហើយធម្មជាតិរបស់វាត្រូវបានបង្កើតឡើង ដើម្បីជួយអ្នកឱ្យមានការប្រុងប្រយ័ត្ន និង មានការប្រតិកម្មរហ័សនៅពេលប្រឈមនឹងគ្រោះថ្នាក់។
មួយវិញទៀត បើអ្នកចេះតែមានអារម្មណ៍មួម៉ៅ ឬសោកសៅជាងធម្មតា វាជាសញ្ញានៃអ័រម៉ូនរីករាយប្រភេទ serotonin បានធ្លាក់ចុះខ្លាំង។ អ័រម៉ូននេះមានមុខងារផ្សារភ្ជាប់ទៅនឹងអារម្មណ៍ ដែលពាក់ព័ន្ធនឹងសេចក្តីពេញចិត្ត និង គំនិតវិជ្ជមាន។ កាលណាវាស្ថិតនៅកម្រិតទាប វាបណ្តាលឱ្យមុខងារប្រព័ន្ធភាពស៊ាំរាងកាយចុះខ្សោយ ហើយបង្កជាជំងឺផ្លូវចិត្តជាច្រើនប្រភេទ ដូចជា ជំងឺបាក់ទឹកចិត្ត អារម្មណ៍អន្ទះអន្ទែង និង ជំងឺ OCD (Obsessive-compulsive disorder) ជាដើម។
សូម្បីតែការរួមដំណេក ក៏ត្រូវបានរាប់បញ្ចូលផងដែរ។ តួយ៉ាង បើចង្វាក់ផ្លូវភេទជាមួយដៃគូមានអារម្មណ៍ដូចធម្មតាៗ លែងរំភើប វាជាសញ្ញាដែលអ័រម៉ូនកំពុងប្រាប់ថាមានអ្វីខុសប្រក្រតី។
ផ្ទុយមកវិញ បើអ្នកពិតជាស្ថិតក្នុងទំនាក់ទំនងត្រឹមត្រូវ ដៃគូរបស់អ្នកនឹងធ្វើឱ្យអ្នកមានអារម្មណ៍មានផាសុកភាព មានភាពកក់ក្តៅ និង សុវត្ថិភាពផ្លូវចិត្តបំផុត។ អ្វីដែលសំខាន់ទៀតនោះ ប្រសិនបើជម្លោះក្នុងទំនាក់ទំនងនៅតែកើតឡើងដដែលៗ ហើយអ្នកព្យាយាមដោះស្រាយហើយនៅតែមិនប្រសើរឡើង វាដល់ពេលដែលអ្នកគួរតែគិតគូរឡើងវិញ ឬចែកផ្លូវគ្នាដើរ ដើម្បីកុំឱ្យខាតពេលកាន់តែយូរ៕
ប្រភព៖ NYP
