នៅរសៀលថ្ងៃទី ២៥ ខែកញ្ញា ឆ្នាំ ២០២៥ នេះ ក្រសួងការពារជាតិ នៃព្រះរាជាណាចក្រកម្ពុជា បានជូនព័ត៌មានឱ្យបានដឹងថា នៅព្រឹកថ្ងៃទី ២៥ ខែកញ្ញា ឆ្នាំ ២០២៥ មានផេកផ្លូវការរបស់កងទ័ពជើងគោកថៃ និង សារព័ត៌មានរបស់ថៃមួយចំនួនបានចុះផ្សាយថា «កម្ពុជាបង្កហេតុពេញមួយយប់នៅតំបន់យោធភូមិ ភាគទី ២» ដោយឮសំឡេងកាំភ្លើង, សំឡេងផ្ទុះគ្រាប់បែក, រកឃើញការចូលជិតលួសបន្លាហើយការបាញ់ ដើម្បីពិនិត្យមើលរយៈចម្ងាយ។
ដូច្នេះ ក្រសួងការពារជាតិ នៃព្រះរាជាណាចក្រកម្ពុជា សូមស្រាយបំភ្លឺថា កងកម្លាំងរបស់កម្ពុជាមិនបានបង្កហេតុ ឬ ធ្វើសកម្មភាពណាមួយ ដែលរំលោភបំពានលើកិច្ចព្រមព្រៀងបទឈប់បាញ់ ដូចការលើកឡើងរបស់ភាគីថៃឡើយ។
ផ្ទុយទៅវិញក្រសួងការពារជាតិកម្ពុជា បានឱ្យដឹងថា បើយោងតាមការបញ្ជាក់ពីកងកម្លាំងរបស់កម្ពុជាយើង ដែលឈរជើងនៅជួរមុខបានឱ្យដឹងថា ៖ នៅរំលងអធ្រាត្រ ថ្ងៃទី ២៥ ខែកញ្ញា ឆ្នាំ ២០២៥
នៅវេលាម៉ោង ២:៥៧ នាទីព្រឹក មានផ្ទុះការបាញ់កាំភ្លើងនៅខាងភាគីថៃ ចំនួនមួយគ្រាប់
នៅវេលាម៉ោង ៥:០០ នាទីព្រឹក មានផ្ទុះការបាញ់កាំភ្លើងនៅខាងភាគីថៃ ចំនួនមួយគ្រាប់
នៅវេលាម៉ោង ៦:០០ នាទីព្រឹក មានផ្ទុះការបាញ់កាំភ្លើងនៅខាងភាគីថៃ ចំនួនមួយគ្រាប់
នៅវេលាម៉ោង ៧:០០ នាទីព្រឹក មានផ្ទុះការបាញ់កាំភ្លើងនៅខាងភាគីថៃ ចំនួនមួយគ្រាប់
គួរឱ្យដឹងផងដែរថា កងកម្លាំងរបស់កម្ពុជា ប្តេជ្ញាចិត្តយ៉ាងពេញលេញ ចំពោះការគោរព និង អនុវត្តនូវកិច្ចព្រមព្រៀងនៃបទឈប់បាញ់រវាងយោធាកម្ពុជា និង យោធាថៃ បានយ៉ាងម៉ឺងម៉ាត់ និង ខ្ជាប់ខ្ជួនបំផុត ជាមួយនឹងស្មារតីនៃការប្តេជ្ញាចិត្តក្នុងការសហការគ្នានៅគ្រប់កម្រិត កម្ពុជាតែងតែរក្សានូវកិច្ចសហការល្អជាមួយគ្នា។ ក្នុងនោះផងដែរ ក្រុមទំនាក់ទំនងរវាងកម្ពុជា-ថៃ នៅជួរមុខ គឺបានធ្វើការជាមួយគ្នាជាប់ជាប្រចាំ តាមរយៈការផ្តល់ព័ត៌មាន ឬការបញ្ជាក់គ្នាទៅវិញទៅមក ដើម្បចៀសវាងការភាន់ច្រឡំ ឬ ការបង្កភាពតានតឹងណាមួយដែលមិនចាំបាច់៕
