អ្នកនិយមតាមដានវិស័យសិល្បៈ ច្បាស់ជាបានស្គាល់មកហើយតារាស្រី ស្កាលេត ប៊ី ដោយបច្ចុប្បន្ន នាងបានវិវត្តន៍ខ្លួនមកធ្វើជាអ្នកផលិតមាតិកាមួយរូបដ៏មានប្រជាប្រិយភាព។ ក្នុងនោះ មាតិកា ដែល ស្កាលេត បានផលិត គឺពាក់ព័ន្ធនឹងរឿងរន្ធត់ផងដែរ។
ដោយឡែក ថ្មីៗនេះ កញ្ញា ស្កាលេត បាន និង កំពុងទទួលបានការបញ្ចេញមតិពីសំណាក់អ្នកទស្សនាមួយចំនួន នូវវីដេអូចុងក្រោយរបស់នាង ដែលនិយាយពាក់ព័ន្ធនឹងរឿងរន្ធត់មួយ នៅរីស៊តក្នុងខេត្តកោះកុង។
ក្នុងនោះ មហាជនមួយចំនួនតូចបានលើកឡើងថា កញ្ញា ស្កាលេត មិនគួរបញ្ចេញឈ្មោះចំៗពេក ព្រោះវាមិនចំណេញដល់វិស័យទេសចរណ៍។ រីឯខ្លះទៀតបានលើកឡើងថា បើទោះជាកញ្ញា មិនបានបញ្ចេញឈ្មោះចំក្តី ប៉ុន្តែខេត្តកោះកុង មានរីស៊តមិនច្រើននោះទេ ដូច្នេះអាចនឹងធ្វើឱ្យភ្ញៀវទេសចរណ៍មានការខ្លាច មិនហ៊ានទៅកម្សាន្តជាដើម។
ស្របពេលនឹងមានការរិះគន់ខាងលើ ក៏មានមហាជនជាច្រើនបានបញ្ចេញមតិថា ការ reviews រឿងបែបរន្ធត់ពីតំបន់នានារបស់កញ្ញា ស្កាលេត គឺដូចជាមិនមានអ្វីខុស ឬក៏ប៉ះពាល់នោះឡើយ ពោលគឺមានអ្នកចូលចិត្តទស្សនាការអត្ថាធិប្បាយរឿងរន្ធត់របស់នាងច្រើន។
យ៉ាងណាក៏ដោយ បន្ទាប់ពីមានមតិរិះគន់ និង សរសើរពីការផលិតទន្ទឹមគ្នានោះ កញ្ញា ស្កាលេត ក៏បានចេញមកបង្ហោះសំណេរជាសាធារណៈ និង កែតម្រូវនូវការខ្វះខាតរបស់ខ្លួនថា៖ «សួស្ដី និងជម្រាបសួរដល់បងប្អូនប្រិយមិត្តទាំងអស់គ្នាជាទីគោរព នាងខ្ញុំមានសារ ជាសាធារណៈ ដើម្បីជម្រាបជូនដល់បងប្អូន។ ជាក់ស្ដែង មាតិកាលើផេកនេះ ត្រូវបានបង្កើតឡើង ៥-៦ ឆ្នាំហើយ ដើម្បីចែករំលែកបទពិសោធផ្សេងៗ រួមទាំងបទពិសោធរបស់ប្រិយមិត្ត។ យ៉ាងណាមិញ ថ្មីៗនេះយើងខ្ញុំឃើញថា មានមតិយោបល់ជាច្រើនទាក់ទងនឹងការហៅឈ្មោះផ្សេងៗក្នុងការនិទានរបស់យើងខ្ញុំ ដែលទោះបីជាយើងខ្ញុំព្យាយាមប្រយ័ត្នយ៉ាងណាក៏នៅតែមានចំណុចខ្វះខាត។ ត្រង់នេះដែរ យើងខ្ញុំនឹងធ្វើការកែតម្រូវ និង ធ្វើឱ្យកាន់តែប្រសើរឡើង ក្នុងការធ្វើមាតិការបស់យើងខ្ញុំ។ មួយវិញទៀត ឆ្លៀតឱកាសនេះ យើងខ្ញុំសូមសម្ដែងការអរគុណដល់បងប្អូនប្រិយមិត្តដែលតែងតែស្រលាញ់រាប់អាន និង គាំទ្រមាតិការបស់យើងខ្ញុំតាំងពីដើមមកដល់ពេលនេះ។ ដោយក្តីគោរព និងការរាប់អាន!»៕
