បើគិតមកដល់ពេលនេះ រយៈពេលប្រមាណជិត ១ ខែ មកហើយ ដែលតារាចម្រៀងរ៉េប KingChi បានប្រកាសពីសុខទុក្ខជំងឺរបស់ភរិយា ដែលត្រូវលាងឈាមជាប្រចាំ និង ត្រូវវះកាត់ប្តូរក្រលៀនផងនោះ។
ក្រោយពីទទួលបានដំណឹងនេះហើយ គេបានឃើញមហាជន អ្នកគាំទ្រ និង មិត្តសិល្បករជាច្រើន បានចូលរួមជាចំណែកមួយជួយសម្រួលដល់ KingChi ក្នុងការព្យាបាលភរិយា តាមរយៈការជូនជាថវិកាដល់លោកផងដែរ។
ដោយឡែក ក្រោយពីបានព្យាបាលជំងឺ ដោយការលាងឈាមបានមួយរយៈ អ្នកនាង ម៉ាណូឡែន ភរិយាតារាចម្រៀងរ៉េប KingChi ក៏តែងបង្ហាញពីស្ថានភាពជំងឺរបស់អ្នកនាងជូនដល់មហាជន និង មិត្តភក្តិលើបណ្តាញសង្គមផងដែរ។ ម្យ៉ាងវិញទៀត កាលពីពេលថ្មីៗកន្លងទៅ ភរិយាតារាចម្រៀងរ៉េបខាងលើ ក៏បានឱ្យដឹងថា អ្នកនាងបានប្រសើរខ្លះហើយ ហើយត្រៀមទៅព្យាបាលនៅក្រៅប្រទេសផងដែរ។
យ៉ាងណាមិញ អ្វីដែលកំពុងតែធ្វើឱ្យមហាជនសរសើរដល់ភរិយាតារាចម្រៀងរ៉េប KingChi នោះ ខណៈដែលខ្លួនកំពុងមានសុខភាពមិនរឹងមាំក្តី ប៉ុន្តែអ្នកនាង ម៉ាណូឡែន បានបំពេញតួនាទីយ៉ាងល្អដូចដើម ក្នុងការមើលថែ យកចិត្តទុកដាក់ស្វាមី ពេលចេញទៅធ្វើការខាងក្រៅម្តងៗ។ ក្នុងនោះ សូម្បីតែ KingChi ក៏បានបង្ហោះពីភរិយាលើគណនីហ្វេសប៊ុកផេកថា៖ «យប់ឡើងធ្វើជំនួយការប្តី ថ្ងៃឡើងលាងឈាមធម្មតា។ រឹងមាំណាស់ ប្រពន្ធសម្លាញ់ចិត្តបង»៕
