ថ្មីៗនេះ សារព័ត៌មាន Etoday បានរាយការណ៍ពីករណីឃាតកម្មលួចបាញ់សម្លាប់មួយទៅលើនារី Influencer វ័យក្មេងជនជាតិប្រស៊ីលម្នាក់ ក្រោយពីនាងបានទៅដើរលេង ហើយឆ្លៀតបង្ហោះប្រាប់ទីតាំងរបស់ខ្លួននៅតាមបណ្តាញសង្គម។
តាមព័ត៌មានបានឱ្យដឹងថា នារីរូបនេះឈ្មោះថា Larissa Mayrla មានវ័យ ១៩ ឆ្នាំ ហើយកាលពីថ្ងៃទី ៣០ ខែកញ្ញា ឆ្នាំ ២០២៥ កន្លងទៅ នាង និងមិត្តភក្តិប៉ុន្មាននាក់ បានគ្នាទៅលេងកម្សាន្តនៅរីសតមួយកន្លែងនារដ្ឋ Maranhão។ ក្នុងនោះ ខណៈកំពុងសម្រាកកម្សាន្ត Larissa ក៏បានឆ្លៀតបង្ហោះរូបថតមួយនៅសន្លឹកនៅតាមបណ្តាញ IG ដោយមាន Check In ប្រាប់ពីទីតាំងដែលនាងកំពុងសម្រាកផង។
យ៉ាងណាមិញ ក្រោយមក នៅពេលដែលនាងរួមទាំងមិត្ភភក្តិកំពុងនាំគ្នាត្រឡប់ចេញពីរីសតវិញ នៅសុខៗស្រាប់តែមានបុរស ២ នាក់ បានចេញមកប្រើកាំភ្លើងធ្វើការបាញ់ប្រហារលើនាងតែម្នាក់គត់ រួចក៏គេចខ្លួនបាត់ទៅ ហើយខាងអ្នកសង្រ្គោះក៏បានព្យាយាមមកសង្រ្គោះដែរ តែជាអកុសលនាងបានបាត់បង់ជីវិតទៅហើយ។ ដោយឡែក ខាងអាជ្ញាធរបានកំពុងស៊ើបពិនិត្យរកមុខជនដៃដល់ និងមូលហេតុនៃការសម្លាប់ ដោយសន្និដ្ឋានថារឿងនេះអាចបណ្តាលមកពីជម្លោះណាមួយ៕
