ជាការពិតណាស់ ការលះបង់ជួយដល់ការងារសង្គមពីបវរកញ្ញាកម្ពុជា មិនមែនមានតែកញ្ញា កុយ អេនណា តែម្នាក់នោះទេ ពោលគឺកន្លងមកក៏មានបវរកញ្ញាជាច្រើនបានចូលរួមទៅតាមសកម្មភាពនានារបស់ខ្លួន ប៉ុន្តែសម្រាប់កញ្ញា កុយ អេនណា បាន និង កំពុងឆក់យកបេះដូងប្រជាជនជាច្រើន ព្រោះនាងគឺជាស្ត្រីដំបូងបានដើរក្នុងរយៈចម្ងាយជាង ៣០០ គីឡូម៉ែត្រដើម្បីសង្គម។
ដំណើរនៃការដើរថ្មើរជើងរបស់កញ្ញា កុយ អេនណា គឺបានចាប់ផ្តើមតាំងពីថ្ងៃទី ០៤ ខែកញ្ញា ឆ្នាំ ២០២៥ មកម្ល៉េះ ហើយការបញ្ចប់នៅមិនទាន់ជាក់លាក់នៅឡើយ ពោលគឺកំណត់ទៅតាមពេលវេលាជាក់ស្តែងនៃការដើររបស់នាង។ ក្នុងនោះ ដំណើរថ្មើរជើងនេះ កញ្ញា កុយ អេនណា ធ្វើឡើងក្នុងគោលបំណង ២ គឺ ដើម្បីរៃអង្គាសថវិកាសប្បុរសធម៌ ជួយគាំទ្រដល់ក្មេងៗ ឬជនពិការក្នុងមណ្ឌលខ្វះខាតនៅកម្ពុជា និង ដើម្បីចូលរួមចំណែកផ្សព្វផ្សាយពីការធ្វើដំណើរទេសចរណ៍ពីរាជធានីភ្នំពេញឆ្ពោះទៅកាន់ទឹកដីសៀមរាបផងដែរ។
ដោយឡែក អ្វីដែលកំពុងតែធ្វើឱ្យមហាជនខ្លោចចិត្តអាណិតនូវការលះបង់របស់កញ្ញា កុយ អេនណា នាថ្ងៃទី ១៤ នៃការដើរថ្មើរជើងរបស់នាង ពោលគឺនៅរសៀលថ្ងៃទីថ្ងៃទី ១៧ ខែកញ្ញា ឆ្នាំ ២០២៥ កញ្ញា កុយ អេនណា បាន update ព័ត៌មានរបស់ខ្លួនក្នុង Channel Telegram ពីស្ថានភាពជើងរបស់នាង ដែលចាប់ផ្តើមហើម និង ជាំបណ្តើរៗហើយ។ ក្នុងនោះ មហាជនបានសម្តែងការកោតសរសើរ និង ព្រួយបារម្ភពីសុខភាពរបស់នាងដូចគ្នាដែរ ដែលត្រឹមតែជានារីម្នាក់ លះបង់កម្លាំងកាយដល់ថ្នាក់នេះសម្រាប់កម្ពុជា៕
