ជារឿងនឹកស្មានមិនដល់ នៅព្រឹកថ្ងៃទី ១៥ ខែកក្កដា ឆ្នាំ ២០២៥ នេះ កម្លាំងជំនាញរបស់អង្គភាព CMAC បានជូនដំណឹងពីការរកឃើញ កាំភ្លើងជាច្រើនដើម រួមទាំងវិទ្យុទាក់ទងមួយចំនួន ដែលជាគ្រឿងសព្វាវុធនៅសេសសល់ពីសម័យសង្គ្រាម ក្នុងភូមិសាស្ត្រទឹកដីដំរីជាន់ខ្លា ខេត្តកំពង់ធំ។
ទាក់ទិនទៅនឹងករណីនេះ ខាង CMAC បានបញ្ជាក់ឱ្យបានដឹងថា នៅថ្ងៃទី ១៤ ខែកក្កដា ឆ្នាំ ២០២៥ កម្លាំងជំនាញរបស់អង្គភាព CMAC បានបន្តបោសសម្អាតសំណល់សង្គ្រាមនៅភូមិទូកពីរ ឃុំគគីធំ ស្រុកបារាយណ៍ ខេត្តកំពង់ធំ ក្នុងការប្រែក្លាយដីអតីតសមរភូមិនេះ ឱ្យក្លាយជាតំបន់កសិកម្មដ៏មានសុវត្ថិភាព និង អាចប្រើប្រាស់បានវិញសម្រាប់ការអភិវឌ្ឍន៍ជីវភាពប្រជាពលរដ្ឋ។
ដោយឡែក ក្នុងអំឡុងការបោសសម្អាតនេះ ក្រុមការងារបានរកឃើញកាំភ្លើងចំនួន ៥២ ដើម និង វិទ្យុទាក់ទងចំនួន ៣ គ្រឿង ដែលខាង CMAC បញ្ជាក់ឱ្យបានដឹងថា គឺជាគ្រឿងសព្វាវុធ ដែលនៅសេសសល់ពីសម័យសង្គ្រាម៕
