នៅថ្ងៃទី ១៥ ខែឧសភា ឆ្នាំ ២០២៥ គឺជាថ្ងៃប្រារព្ធព្រះរាជពិធីច្រត់ព្រះនង្គ័ល ដែលបានធ្វើឡើងនៅក្នុងភូមិសាស្ត្រខេត្តកំពង់ឆ្នាំង ដែលនៅក្នុងព្រះរាជពិធីឆ្នាំនេះ គោឧសភរាជបរិភោគ ស្រូវ ៩៥ ភាគរយ ពោត ៩៥ ភាគរយ និង សណ្តែក ៨០ ភាគរយ ខណៈតាមការបរិភោគនេះ បង្ហាញថាឆ្នាំម្សាញ់នេះ ស្រូវ ពោត និង សណ្តែក នឹងទទួលបានផលល្អប្រសើរ។
គួរឱ្យដឹងផងដែរថា បន្ទាប់ពីបានច្រត់ព្រះនង្គ័ល ៣ ជុំរួចហើយនោះ ព្រាហ្មណ៍ព្រះរាជគ្រូ បានសូត្រពាក្យអធិដ្ឋានផ្សងគោឧសភរាជ ដែលទឹមច្រត់ព្រះនង្គ័លនោះ ឱ្យបរិភោគអាហារ ៧ យ៉ាង ដែលភ្នាក់ងាររៀបដាក់តុប្រាក់ធំៗតាំងទុកនៅទីមុខព្រះពន្លា គឺគ្រាប់ស្រូវ ១ តុ គ្រាប់សណ្ដែក ១ តុ គ្រាប់ពោត ១ តុ គ្រាប់ល្ង ១ តុ ស្មៅស្រស់ ១ តុ ទឹក ១ តុ ស្រា ១ តុ។
ក្នុងនោះ តាមព្រះរាជបវេណីរបស់ខ្មែរក្រោយសូត្រពាក្យអធិដ្ឋានចប់ ព្រាហ្មណ៍ព្រះរាជគ្រូ យកទឹកមន្តប្រោះក្បាលព្រះគោទាំងពីរ ហើយមន្ត្រីមួយរូប ដែលកាន់នង្គ័លស្តេចមាឃ ដឹកគោឧសភរាជទាំងពីរទៅឱ្យបរិភោគរបស់ទាំង ៧ យ៉ាង។ ដឹកទៅជិតរបស់ ៧ យ៉ាងស្រេចហើយ គោឧសភរាជចូលចិត្តបរិភោគ អ្វីក៏បរិភោគទៅ គេមិនបង្ខំឱ្យបរិភោគចំពោះអាហារណានីមួយៗទេ កាលព្រះគោ បរិភោគអ្វីមួយយ៉ាង ឬ ពីរយ៉ាង ព្រាហ្មណ៍ក៏ទាយផលប្រផ្នូលទៅខាងមុខតាមនោះ។
ឯទំនាយមិនជាការប្រាកដប៉ុន្មានទេ គឺថាបើព្រះគោបរិភោគអ្វី ក៏ទាយថា ក្នុងឆ្នាំនេះ៖ របស់នោះសម្បូរប្លែក តែបើបរិភោគស្មៅទាយថា នឹងកើតជំងឺគោ បើបរិភោគស្រានឹងកើតមនុស្សពាល ចោរលួច ចោរប្លន់ជាច្រើន៕
