ដូចមហាជនបានជ្រាបមកហើយ នូវរឿងរ៉ាវបំណុលរបស់តារាកំប្លែង ស្រីខ្ញុង កាលពីពេលកន្លងមក ដែលនាងបានលង់ជំពាក់បុលគេវ័ណ្ឌក មិនទាន់ដោះស្រាយបានរហូតមកដល់ពេលនេះ។ ក្នុងនោះ រឿងបំណុលរបស់អ្នកនាង ខ្ញុង ដែលតែងតែផ្ទុះលើកមកជជែកលើបណ្តាញសង្គមជាញឹកញាប់នោះ ខណៈលោក ម៉ាដូណា ដែលជាម្ចាស់បំណុល បានបង្ហោះទារលុយនាង ព្រោះតែនាងមិនទាន់បានសងនៅឡើយ។
ជាក់ស្តែង ថ្មីៗនេះ លោក ម៉ាដូណា ក៏បានចេញមកទម្លាយរឿងបំណុលរបស់ ខ្ញុង ជាថ្មី រហូតអ្នកនាង ខ្ញុង បានចេញមកបង្ហោះវីដេអូសុំទោសដល់ម្ចាស់បំណុលជាថ្មី។ លើសពីនោះ វីដេអូនោះ អ្នកនាង ខ្ញុង ក៏បានអមនូវសារថា៖ «សូមអរគុណ និង សុំទោសដល់ម្ចាស់បំណុលគ្រប់គ្នា ដែលខ្ញុំមិនទាន់មានលទ្ធភាព។ តាមកំហឹងដែលបងប្អូនខឹង ចង់ជេរដៀលថាផុសម៉េចក៏បាន! ហើយក៏អរគុណបងប្អូន អ្នកខមមិនទាំងដែលអ្នកខ្លះមិនដឹងរឿង មិនស្គាល់ខ្ញុំ ខំប្រឹងជេរដៀលប្រមាថដែរ»។
យ៉ាងណាមិញ អ្វីដែលកាន់តែធ្វើឱ្យអ្នកលេងបណ្តាញសង្គមហ្វេសប៊ុកផ្ទុះការភ្ញាក់ផ្អើលនោះ ក្រោយពីឃើញខមមិនមួយរបស់អ្នកនាង ខ្ញុង បានសរសេរក្រោមវីដេអូនោះថា នាងសឹងតែបញ្ចប់បុណ្យខ្លួនឯង តែដោយសារកូនក្នុងពោះ ដូចចង់បញ្ជាក់ថា ពេលនេះអ្នកនាងកំពុងពពោះកូនទី ៣។
ខមមិននោះ អ្នកនាង ខ្ញុង បានសរសេរថា៖ «រយៈពេល ៤ ឆ្នាំហើយ ដែលខ្ញុំត្រូវរងសម្ពាធផ្លូវចិត្ត ប្រឹងត្រដាបត្រដួសខំរស់ទាំងអាម៉ាស់ តែទោះក្នុងកាលៈទេសៈណាខ្ញុំមិនដែលគិតថា ចង់ចាកចេញពីពិភពលោកនេះទេ ព្រោះតែទំនួលខុសត្រូវចំពោះមនុស្សដែលខ្ញុំបានបង្កើតមក និង បំណុលដែលខ្ញុំបានសាងឡើង តែហេតុអីថ្ងៃនេះ ខ្ញុំមានអារម្មណ៍ថាហត់ លែងចង់ទៅមុខលែងចង់បន្ត ឬក៏ខ្ញុំត្រូវអស់បុណ្យហើយ។ តើកូន ដែលនៅក្នុងពោះខ្ញុំ គ្នានឹងទៅជាយ៉ាងណា?»៕
សូមចុចទីនេះ ដើម្បីទស្សនាវីដេអូ៖
