មហាជនអ្នកប្រើប្រាស់បណ្ដាញសង្គម បាននាំគ្នាសម្ដែងការសោកស្ដាយ និង ចូលរួមរំលែកទុក្ខ បន្ទាប់ពីទទួលបានដំណឹង ករណីក្មេងស្រីម្នាក់ ត្រូវបានរន្ទះបាញ់កណ្ដាលថ្ងៃ បណ្ដាលឱ្យបាត់បង់ជីវិត ស្ថិតក្នុងភូមិសាស្ត្រខេត្តព្រះសីហនុ។
ទាក់ទិនទៅនឹងករណីនេះ តាមរយៈប្រភពដែលមានគណនីឈ្មោះ Ken Rotana បានបង្ហោះវីដេអូនៅថ្ងៃទី ២៤ ខែមេសា ឆ្នាំ ២០២៥ នេះ ភ្ជាប់ជាមួយដំណឹងដ៏ក្រៀមក្រំឱ្យបានដឹងថា មានករណីរន្ទះបាញ់ បណ្ដាលឱ្យក្មេងស្រីម្នាក់បានបាត់បង់ជីវិត នៅថ្ងៃទី ២៤ ខែមេសា ឆ្នាំ ២០២៥ វេលាម៉ោង ១៣:៤៥ នាទី នៅចំណុចសំបុកមាន់ ស្ថិតនៅភូមិបឹងត្រាច ឃុំចំការហ្លួង ស្រុកកំពង់សីលា ខេត្តព្រះសីហនុ។
តាមប្រភពបានឱ្យដឹងបន្ថែមថា កំឡុងពេលដែលមានភ្លៀងលាយឡំនឹងផ្គររន្ទះ ជនរងគ្រោះកំពុងអង្គុយហូបផ្លែសេមាន់លេង នៅក្រោមផ្ទះឈ្មោះ ខុម ស៊ីណាត ដែលត្រូវជាអ្នកជាប់របងផ្ទះគ្នា ស្រាប់តែពេលនោះក៏មានរន្ទះបាញ់ បាញ់មកត្រូវជនរងគ្រោះមានឈ្មោះ ម៉ៅ លីណា ភេទស្រី អាយុ ១៣ ឆ្នាំ បណ្ដាលឱ្យបាត់បង់ជីវិត។ បច្ចុប្បន្នសពត្រូវបានក្រុមគ្រួសារយកធ្វើបុណ្យតាមប្រពៃណី៕
