កាលពីល្ងាចថ្ងៃទី ០៥ ខែមិថុនា ឆ្នាំ ២០២៥ កន្លងទៅនេះ ពិធីបូជាសពរបស់ឯកឧត្តមព្រឹទ្ធាចារ្យ ក្រមាមាស សាន គឹមស៊ាន ហៅលោកគ្រូតាក្រមាមាស អនុប្រធានសហព័ន្ធកីឡាគុនល្បុក្កតោកម្ពុជា បានរៀបចំរួចរាល់ហើយ ដោយប្រព្តឹត្តឡើងនៅវត្តអង្គតាមិញ។
ក្នុងនោះ ការជូនដំណើរ ឯកឧត្តមព្រឹទ្ធាចារ្យ ក្រមាមាស សាន គឹមស៊ាន ហៅលោកគ្រូតាក្រមាមាស ជាលើកចុងក្រោយ ក៏មានការផ្តល់ភ្លើងបូជាសពជូនលោកព្រឹទ្ធាចារ្យក្រមាមាស ពីឯកឧត្តមទេសរដ្ឋមន្ត្រី ថោង ខុន ប្រធានគណៈកម្មាធិការជាតិអូឡាំពិកកម្ពុជា។
ដោយឡែក អ្វីដែលកាន់តែក្តុកក្តួលរកអ្វីប្រៀបផ្ទឹមពុំបាន នៃការជូនដំណើរជាលើកចុងក្រោយ ដើម្បីស័ក្តសមនូវការនាំការប្រឹងប្រែងទាំងកម្លាំងកាយចិត្តតស៊ូអស់ជាច្រើនជំនាន់ ខិតខំចងក្រង អភិរក្ស និង លើកកម្ពស់គុនល្បុក្កតោរហូតដល់ដង្ហើមចុងក្រោយរបស់ លោកគ្រូតា ក្រមាមាស នោះ កីឡាករគុនល្បុក្កតោជាច្រើនជំនាន់ បានគ្រងឈុតល្បុក្កតោដង្ហែ និង សម្តែងជូនលោកគ្រូតា ជាលើកចុងក្រោយផងដែរ៕
រូបភាព៖ សហព័ន្ធកីឡាករគុនល្បុក្កតោកម្ពុជា
